News - Հայաստանը և Սաուդյան Արաբիան կակտիվացնեն կապերը կրթության ոլորտում (ՖՈՏՈ)

Չորեքշաբթի սկսվել է Հայաստանի արտաքին գործերի նախարար Արարատ Միրզոյանի այցը Սաուդյան Արաբիա, որը երկու երկրների միջև առաջին բարձր մակարդակի այցն է 2023 թվականի նոյեմբերին դիվանագիտական ​​հարաբերությունների հաստատումից հետո։ Հայաստանի արտաքին գործերի նախարարությունից NEWS.am -ին հայտնում են, որ Էր-Ռիադ կատարած այցի սկզբում արտգործնախարար Միրզոյանը հանդիպել է Սաուդյան Արաբիայի կրթության նախարար Յուսեֆ Բին Աբդուլլահ Ալ-Բենյանի հետ։ Զրուցակիցները գոհունակությամբ արձանագրեցին երկու երկրների միջև ձևավորվող բարձր մակարդակի քաղաքական երկխոսությունը և նշեցին, որ Հայաստանի արտգործնախարարի այս այցը նոր խթան կհանդիսանա Հայաստանի և Սաուդյան Արաբիայի միջև տարբեր առանցքային ոլորտներում համագործակցության զարգացման համար։ Հանդիպման ընթացքում երկու նախարարները քննարկել են կրթության ոլորտում համագործակցությունը՝ երկուստեք պատրաստակամություն հայտնելով քայլեր ձեռնարկել գիտության և մշակույթի բնագավառներում նաև կապերի ընդլայնման ուղղությամբ։ Պայմանավորվածություն է ձեռք բերվել ակտիվացնել շփումները Հայաստանի և Սաուդյան Արաբիայի միջև՝ կրթական տարբեր մակարդակներում փորձի փոխանակման, մասնագիտական ​​վերապատրաստման, ինչպես նաև կրթաթոշակների և մարդկային ռեսուրսների մեծ ներուժի փոխշահավետ իրացման նպատակով։ Նաև Արարատ Միրզոյանը և Յուսեֆ Բին Աբդուլլահ Ալ-Բենյանը կարևորել են բժշկության և տեխնիկական գիտությունների ոլորտում առկա հնարավորությունների առավելագույն օգտագործումը և նոր ծրագրերի մեկնարկը։ Եզրափակելով քննարկումը` երկու նախարարները ընդգծեցին հայ և արաբ ժողովուրդների պատմականորեն ձևավորված բարեկամությանը և փոխադարձ համակրանքին համահունչ միջպետական ​​կապերը խթանելու մեծ պատրաստակամությունը: