News - Փաշինյանը հանդիպել է նաև Բերքաբեր գյուղի բնակիչների հետ

Շարունակվում է ՀՀ վարչապետ Նիկոլ Փաշինյանի այցը Տավուշի մարզ։ Ոսկեպար և Կիրանց գյուղերի բնակիչների հետ ունեցած հանդիպումներից հետո վարչապետը հանդիպել է նաև Բերքաբեր գյուղի բնակիչների հետ։ Բայց այս բոլոր հանդիպումները փակ են եղել, մարդկանց թույլ չեն տվել լուսանկարել կամ տեսանկարահանել։ Ինչպես ավելի վաղ հայտնել էինք, Նիկոլ Փաշինյանը մարտի 18-ին այցելել էր նաև Ոսկեպար գյուղ և հանդիպել տեղի բնակիչների հետ։ Այն ժամանակ նա խոստացել էր հաջորդ հանդիպումը նրանց հետ անցկացնել տասը օր հետո, սակայն այս սահմանամերձ գյուղի բնակիչների հետ հանդիպեց միայն այսօր։ Վարչապետ Նիկոլ Փաշինյանի նախորդ հանդիպումը ոսկեպարցիների հետ հարթ չի անցել. Այդ հանդիպման թեման Տավուշի չորս գյուղերը Ադրբեջանին հանձնելն էր, ինչին ոսկեպարցիներն իրենց դեմ արտահայտվեցին։ Փաշինյանը գյուղացիներին ասել էր, որ վերոնշյալ գյուղերը պետք է հանձնվեն Ադրբեջանին, հակառակ դեպքում նորից պատերազմ կսկսվի։ Խոսքը Բաղանիս-Այրում, Աշաղի Ասքիպարա, Խեյրիմլի, Ղըզըլհաջիլի գյուղերի մասին է։ Իսկ իր վերջին ասուլիսում Նիկոլ Փաշինյանը հայտարարել էր, որ այս չորս գյուղերը Հայաստանի կազմում չեն։