News - ՀՀ վարչապետը կրկին Ոսկեպար գյուղում, անվտանգության խիստ միջոցառումներ են իրականացվում

ՀՀ վարչապետ Նիկոլ Փաշինյանը կրկին ժամանել է Տավուշի մարզի Ոսկեպար գյուղ։ Եվ այս առումով անվտանգության խիստ միջոցառումներ են իրականացվում։ Ոսկեպարցիները հավաքվել են իրենց մշակույթի շենքի մոտ։ Դեռ հայտնի չէ, թե ինչ ձևաչափով կկայանա վարչապետի հետ հանդիպումը։ Գյուղացիներից մեկն ասաց, որ եթե ընտրողաբար իրենց թույլ տան մասնակցել հանդիպմանը, ոչ ոք չի մտնի նշված շենք։ Մարտի 18-ին, երբ Փաշինյանը առաջին անգամ այցելել էր Ոսկեպար, տեղի բնակիչներին խոստացել էր, որ տասն օրից կվերադառնա, բայց մեկ ամիս անց վերադարձավ։ Ինչպես ավելի վաղ տեղեկացրել էինք, Նիկոլ Փաշինյանի նախորդ հանդիպումը ոսկեպարցիների հետ հարթ չի անցել. Այդ հանդիպման թեման Տավուշի չորս գյուղերը Ադրբեջանին հանձնելն էր, ինչին ոսկեպարցիներն իրենց դեմ արտահայտվեցին։ Փաշինյանը գյուղացիներին ասել էր, որ վերոնշյալ գյուղերը պետք է հանձնվեն Ադրբեջանին, հակառակ դեպքում նորից պատերազմ կսկսվի։ Խոսքը Բաղանիս-Այրում, Աշաղի Ասքիպարա, Խեյրիմլի, Ղըզըլհաջիլի գյուղերի մասին է։ Իսկ իր վերջին ասուլիսում Նիկոլ Փաշինյանը հայտարարել էր, որ այս չորս գյուղերը Հայաստանի կազմում չեն։