News - Փաշինյանը՝ Հայաստան-Ղազախստան հարաբերությունների մասին. մենք ընդհանուր պատկերացում ունենք, թե կոնկրետ ինչ գործողություններ պետք է իրականացվեն.

Վարչապետ Նիկոլ Փաշինյանը երկուշաբթի հյուրընկալել է պաշտոնական այցով Հայաստան ժամանած Ղազախստանի նախագահ Կասիմ-Ժոմարտ Տոկաևին։ . Նախ կայացավ դիմավորման պաշտոնական արարողությունը, որի շրջանակներում հնչեցին Հայաստանի և Ղազախստանի օրհներգերը, ապա երկու երկրների ղեկավարները ողջունեցին պատվիրակությունների անդամներին։ Այնուհետև Փաշինյանն ու Տոկաևն առանձնազրույց են ունեցել, որին հաջորդել է ընդլայնված կազմով հանդիպումը։ Վարչապետ Փաշինյանն իր ողջույնի խոսքում ասաց. «Ղազախստանի Հանրապետության հարգարժան նախագահ, Ողջունում եմ Ձեզ և Ձեր պատվիրակությանը Հայաստանի Հանրապետությունում։ Սա ձեր առաջին պաշտոնական այցն է Հայաստանի Հանրապետություն և 2001 թվականից, այսինքն՝ վերջին 23 տարվա ընթացքում, Ղազախստանի նախագահի պաշտոնական այց Հայաստանի Հանրապետություն չի եղել։ Եվ այս առումով այցը շատ կարևոր է, և կարող եմ ասել, որ մինչ այս մեր շփումների ընթացքում մեզ հաջողվել է քննարկել հարցերի լայն շրջանակ՝ ապահովելու մեր երկու երկրների միջև հարաբերությունների հետագա զարգացումը։ Ուրախությամբ կարող եմ արձանագրել, որ մենք ընդհանուր պատկերացում ունենք այս խնդիրների վերաբերյալ, ինչպես նաև, թե կոնկրետ ինչ գործողություններ պետք է իրականացվեն։ Իհարկե, այստեղ առանցքային տեղ ունի տնտեսական համագործակցության խորացումը, նաեւ քաղաքական համագործակցության խորացումը, տարածաշրջանային հարցերում մեր համագործակցությունը։ Ես շատ ուրախ եմ այս հնարավորության համար։ Ուզում եմ ընդգծել, որ այս ամենի հետ մեկտեղ մենք չենք մոռանում համագործակցության մասին մշակութային և հումանիտար ոլորտներում։ Այս տարի Հայաստանի մշակութային օրերը կանցկացվեն Ղազախստանում, հաջորդ տարի՝ Ղազախստանի մշակութային օրերը՝ Հայաստանում։ Նկատի ունեմ, որ մեր օրակարգն իրականում բավականին հարուստ է, և ես վստահ եմ, որ ձեր այցի արդյունքներով մենք կընդունենք որոշումներ, որոնք կծառայեն մեր համագործակցության բոլոր ուղղությունների հետագա խորացմանը։ Մեծարգո պարոն Նախագահ, Թույլ տվեք մեկ անգամ ևս ջերմորեն ողջունել Ձեզ և Ձեր պատվիրակությանը Հայաստանի Հանրապետության մայրաքաղաքում»։ Ղազախստանի նախագահ Կասիմ-Ժոմարտ Տոկաևն իր հերթին նշել է. «Հարգելի Նիկոլ Վովաևիչ, հանդիպման մասնակիցներ, ես սիրով ընդունեցի պաշտոնական այցով Հայաստան այցելելու ձեր հրավերը։ Մենք մեծ հարգանքով ենք վերաբերվում հայ ժողովրդի հին պատմությանը, ավանդույթին և մշակույթին։ Այսօրվա հանդիպումը լրանում է Հայաստանի և Ղազախստանի միջև բարեկամության և համագործակցության պայմանագրի 25-րդ տարեդարձին։ Սա մեծ խորհրդանշական նշանակություն ունի։ Այս ընթացքում մենք ամուր հիմքեր դրեցինք հեռանկարային երկարաժամկետ փոխշահավետ համագործակցության համար։ Քաղաքական երկխոսությունը բոլոր մակարդակներում ակտիվորեն զարգանում է, ներդաշնակ աշխատանք է հաստատվել երկու երկրների կառավարությունների և խորհրդարանների միջև։ Մենք կարողացանք արդյունավետ գործընկերություններ հաստատել նաև բազմաթիվ հարթակներում: Մենք ունենք նմանատիպ տեսակետներ և ընկալումներ բազմաթիվ միջազգային հարցերի վերաբերյալ։ Առևտրատնտեսական կապերը տարեցտարի ընդլայնվում են։ Վերջին հինգ տարում ավելացել է նաև երկկողմ առևտուրը, սակայն մենք դրանով չենք սահմանափակվում, ունենք բավականաչափ ներուժ և հնարավորություններ՝ աշխուժացնելու մեր փոխանակումները։ Այս առումով կարևոր է զարգացնել արդյունաբերության, տրանսպորտի, լոգիստիկայի և գյուղատնտեսության ոլորտները։ Մեր համագործակցությունը նոր ոլորտներում, ինչպիսիք են թվայնացումը և ֆինանսները, նույնպես մեծ ապագա ունի։ Վստահ եմ, որ այս համագործակցությանը կնպաստի նաև վերջերս կայացած բիզնես ֆորումը երկու երկրների ձեռնարկատերերի մասնակցությամբ։ Մենք միշտ շահագրգռված ենք մեր երկու երկրների միջև մշակութային և հումանիտար կապերի ամրապնդմամբ»: Զրուցակիցները քննարկել են Հայաստան-Ղազախստան համագործակցության օրակարգային մի շարք հարցեր։ Մասնավորապես, անդրադարձ է եղել առևտրատնտեսական կապերի հետագա զարգացմանն ու ընդլայնմանը, գյուղատնտեսության, բարձր տեխնոլոգիաների, արդյունաբերության և հումանիտար ոլորտներում համագործակցության խթանմանը։ Կողմերն ընդգծել են երկու երկրների կառավարությունների սերտ համագործակցությունը։ Անդրադարձ է կատարվել տարածաշրջանում տեղի ունեցող գործընթացներին։ Վարչապետ Փաշինյանը ներկայացրել է Հայաստան-Ադրբեջան խաղաղության պայմանագրի, տարածաշրջանում տրանսպորտային ենթակառուցվածքների ապաշրջափակմանն ուղղված Հայաստանի կառավարության «Խաղաղության խաչմերուկ» նախագծի շուրջ քննարկումների ընթացքը։ Կողմերը մտքեր են փոխանակել նաև փոխադարձ հետաքրքրություն ներկայացնող այլ հարցերի շուրջ։