News - Կասիմ-Ժոմարտ Տոկաև. Ղազախստանը պատրաստ է Հայաստան արտահանումը հասցնել 350 միլիոն դոլարի.

Ղազախստանը շահագրգռված է Հայաստանի հետ առեւտրատնտեսական համագործակցության խորացմամբ. Այս մասին երկուշաբթի ՀՀ վարչապետ Նիկոլ Փաշինյանի հետ համատեղ մամուլի ճեպազրույցում և Երևան կատարած պաշտոնական այցի շրջանակում ասաց Ղազախստանի նախագահ Կասիմ-Ժոմարտ Տոկաևը։ Ընդգծելով Հայաստանի հարուստ պատմության և մշակույթի նկատմամբ հատուկ հարգանքը՝ Տոկաևը նշել է, որ Հայաստանը Ղազախստանի համար կարևոր և հուսալի գործընկեր է Հարավային Կովկասում։ «Երկկողմ կապերի ակտիվացումը ընդհանուր նպատակ է»,- նշել է Տոկաևը՝ հավելելով, որ նրանց նպատակները համընկնում են տարածաշրջանային և միջազգային խաղաղության և կայունության հարցերում։ Նրա խոսքով, Հայաստան կատարած այցի ընթացքում տեղի ունեցած բանակցությունները վկայում են, որ երկու կողմերը շահագրգռված են համագործակցության խորացմամբ, քննարկվել են օրակարգային հարցեր, ձեռք են բերվել կոնկրետ պայմանավորվածություններ։ Հատուկ ուշադրություն է դարձվել առևտրատնտեսական և ներդրումային համագործակցության զարգացմանը։ Ինչպես հայտարարել է Ղազախստանի նախագահը, վերջին հինգ տարիների ընթացքում համագործակցությունն այս ոլորտում աճել է, սակայն ներուժն ամբողջությամբ չի օգտագործվել։ «Հետևաբար, մենք կարծում ենք, որ կարևոր է մեծացնել տեմպերը և փնտրել նոր ուղղություններ, որոնք խթան կհաղորդեն երկկողմ հարաբերություններին: Ղազախստանը պատրաստ է Հայաստան արտահանումը հասցնել 350 միլիոն դոլարի»,- ասել է Տոկաևը՝ հավելելով, որ ֆինանսները, գյուղատնտեսությունը և արդյունաբերությունը. նույնպես առաջնահերթ ոլորտներ են։ Տոկաևը նշել է, որ հայկական կողմին առաջարկել է մի շարք երկկողմ ներդրումային ծրագրեր, ինչպես նաև ավելացնել շփումները նրանց ձեռներեցների միջև, ինչը կնպաստի ձեռնարկատիրական խորհրդի ստեղծմանը։ Մեկ այլ կարևոր ոլորտ, ըստ Ղազախստանի նախագահի, տրանսպորտն ու նյութատեխնիկական ապահովումն են։ Այս առումով, Ղազախստանը բարձր է գնահատում Հայաստանի ջանքերը՝ ուղղված Հարավային Կովկասում տրանսպորտային կապերի վերականգնմանը, մասնավորապես՝ Հայաստանի կառավարության «Խաղաղության խաչմերուկ» նախաձեռնությանը: Ղազախստանի կառավարությունն աջակցում է նաև երկու երկրների մայրաքաղաքների և մի շարք այլ քաղաքների միջև ուղիղ չվերթների իրականացման նախաձեռնությանը։ Կողմերը քննարկել են թվային տեխնոլոգիաների ոլորտում համագործակցության հեռանկարները։ Հատուկ նշանակություն է տրվել մշակույթին և հումանիտար հարաբերություններին։ Ղազախստանի նախագահը նշել է միջազգային կազմակերպությունների շրջանակներում Հայաստանի հետ արդյունավետ համագործակցությունը և բազմաթիվ հարցերում նրանց դիրքորոշումների նմանությունը։ Կողմերը պայմանավորվել են շարունակել իրենց ակտիվ մասնակցությունը խաղաղության և կայունության ամրապնդմանը։ Եզրափակելով իր խոսքը՝ նախագահ Կասիմ-Ժոմարտ Տոկաևը վարչապետ Նիկոլ Փաշինյանին հրավիրել է այցելել Ղազախստան։