News - Հնդկաստանն առաջին անգամ Հայաստանում ռազմական կցորդ է նշանակել

Հնդկաստանը ռազմական կցորդներ է ուղարկում տասը նոր երկրներ, առաջին անգամ Հայաստանում կնշանակվի ռազմական ներկայացուցիչ, սակայն հիմնական ուշադրությունը կենտրոնացված է աֆրիկյան երկրների վրա, հայտնում է PTI-ն՝ վկայակոչելով աղբյուրները։ Բարեփոխումն իրականացվում է, ի թիվս այլ բաների, օպտիմիզացնելով բանակի, նավատորմի և օդային ուժերի ներկայացուցիչների թիվը այնպիսի երկրներում, ինչպիսիք են Ռուսաստանը, Ֆրանսիան և Միացյալ Թագավորությունը: Այժմ Դելին 15-16 ռազմական կցորդներ է ուղարկում մի քանի այլ երկրներ, որոնցից մի քանիսն առաջին անգամ կհյուրընկալեն հնդկական ռազմական ներկայացուցիչներին, իսկ որոշները կթարմացնեն կամ կուժեղացնեն գոյություն ունեցող ապարատը։ Շեշտը դրվում է այն երկրների վրա, որոնց հետ Հնդկաստանը զարգացնում է տեխնիկա-ռազմական համագործակցությունը։ «Նրանցից ոմանք արդեն սկսել են աշխատել նոր պաշտոններում, հաջորդ փուլում տարբեր երկրներում կստեղծվեն 10 նոր ռազմական կցորդներ՝ հատուկ շեշտադրումով այն երկրների վրա, որտեղ զենք է արտահանվում»,- ասել է վերոնշյալ գործակալության զրուցակիցը։ Մասնավորապես, Հայաստանում առաջին անգամ նշանակվել է հնդիկ ռազմական կցորդ։ Հնդկաստանն արդեն պայմանավորվել է Հայաստանի հետ Pinaka բազմափողանի հրթիռային կայանների, Ակաշ փոքր հեռահարության զենիթահրթիռային համակարգի և հնդկական արտադրության մի քանի այլ զինատեսակների մատակարարման շուրջ։ «Սա առաջին անգամն է, որ Հայաստանում հատուկ նշանակվում է ռազմական կցորդ»,- ընդգծել է աղբյուրը։ Հնդկաստանի նոր ռազմական ներկայացուցիչներ կուղարկվեն նաև Ջիբութի, Փղոսկրի Ափ, Մոզամբիկ, Լեհաստան, Տանզանիա, Ֆիլիպիններ և Եթովպիա: