News - Հայաստանի իշխող ուժի պատգամավոր. Տավուշի մարզի տարածքները Ադրբեջանին զիջելը խնդիրներ է առաջացնում

Այն, որ այդ տարածքները Ադրբեջանին զիջելը խնդիրներ է առաջացնում, այդ մասին վարչապետը նշեց նաև Ոսկեպար գյուղի բնակիչների հետ հանդիպման ժամանակ։ Այս մասին երեքշաբթի Ազգային ժողովում լրագրողների հետ զրույցում հայտարարեց իշխող մեծամասնության խմբակցության պատգամավոր Վահե Ղալումյանը։ «Այո, դա խնդիրներ է առաջացնում, բայց մենք կարծում ենք, որ դա պետք է արվի։ Տավուշից ոչ մի բնակավայր [Ադրբեջանին] չի հանձնվում, Տավուշի մարզում չեն։ Տավուշի մարզն ունի չորս խոշորացված համայնք, այդ մասին խոսք չկա։ Որևէ խոշորացված համայնքի վարչական տարածքներ, դրանք Տավուշի մարզում չեն, ՀՀ վարչական տարածքային բաժանման մասին օրենքով Տավուշի մարզն ունի չորս խոշորացված համայնք, որոնց բնակավայրերը չեն ներառում այդ բնակավայրերը, այստեղ խոսքը ոչ թե պատմական տարածքների մասին է, այլ ինչի տարածք Հայաստանը ճանաչվել է ՄԱԿ-ի կողմից, ինչ քարտեզով, քանի քառակուսի կիլոմետր»,- ասաց Ղալումյանը։ Դիտարկմանը, որ այդ զիջումից հետո հարակից հայկական գյուղերը կհայտնվեն Ադրբեջանի թիրախում, իշխող ուժի պատգամավորն արձագանքեց. «Ի՞նչ եք առաջարկում, չզիջե՞նք այն, ինչ մերը չէ, իրավական հիմնավորում չունենք. փորձում են փոխանակում կատարել, բայց այստեղ դրվում են խնդիրներ, որոնք սահմանազատման հանձնաժողովի տիրույթում են, այս հանձնաժողովներն ինտենսիվ աշխատում են, մենք փորձում ենք խնդիրը լուծել բանակցությունների միջոցով»։ Անդրադառնալով այն փաստին, որ Ադրբեջանը վերջին օրերին սահմանին ակտիվացել է, կրակոցներ են հնչում, Վահե Ղալումյանն ասաց. «Տարբեր կարծիքներ են հնչում, դա կապում են նաև կայանալիք հանդիպման հետ։ ապրիլի 5-ին [Բրյուսելում]։ Ես ինքս չեմ կարող ասել, թե որն է այդ կրակոցների նպատակը։ Այդ հանդիպումը ևս մեկ քայլ է դեպի խաղաղություն»։ Իսկ հարցին, թե արդեն կա՞ այլընտրանքային ճանապարհների նախագիծ, որպեսզի Ադրբեջանին վերոնշյալ տարածքները զիջելուց հետո հնարավոր լինի կապվել հայկական բնակավայրերի հետ, Ղալումյանն արձագանքեց. Կարծում եմ՝ լուծելի խնդիր է, այս պահին ճանապարհ չի կառուցվում, բայց գիտեմ, որ այդ ուղղությամբ աշխատանքներ են տարվում»։