News - ԵՄ բանագնաց. Մենք արդեն ներգրավել ենք 60 մլն եվրո՝ Հայաստանի կրթական ոլորտը զարգացնելու համար

Ես այստեղ եմ՝ մեր լիակատար աջակցությունը ցույց տալու Հայաստանի կառավարությանը և երիտասարդության ոլորտում նրա աշխատանքին։ Այս մասին հինգշաբթի օրը Գեղարքունիքի մարզի Գավառում «Գավառ. 2024 Հայաստանի երիտասարդական մայրաքաղաք» ծրագրի պաշտոնական բացման արարողության ժամանակ ասաց Հայաստանում Եվրոպական միության (ԵՄ) պատվիրակության ղեկավար, դեսպան Վասիլիս Մարագոսը։ Մարագոսը հավելեց, որ իրենք ողջունում են ամեն տարի երիտասարդական մայրաքաղաք ունենալու այս գաղափարը։ Նա շնորհավորեց բոլոր գավառցիներին, հատկապես երիտասարդներին, Գավառի այս տարվա երիտասարդական մայրաքաղաք ընտրվելու կապակցությամբ։ Նա ասաց, որ իրենք սերտորեն համագործակցում են թե՛ Հայաստանի կրթության, գիտության, մշակույթի և սպորտի նախարարության, թե՛ ՀԿ-ների, թե՛ երիտասարդական ՀԿ-ների հետ։ Նրանք ունեն մի շարք նախաձեռնություններ, խրախուսում են երիտասարդ ակտիվիստներին ստեղծել երիտասարդական կենտրոններ։ Վերոնշյալ նախարարության հետ համագործակցությամբ նրանք արդեն ներգրավել են 60 մլն եվրո Հայաստանի կրթական ոլորտի զարգացման համար, հավելեց ԵՄ դեսպանը։ Երիտասարդությունը Հայաստանի ապագան է, և գիտակցելով երիտասարդների մասնակցության կարևորությունը հայաստանյան կյանքում՝ նրանք վերահաստատում են իրենց հանձնառությունը շարունակելու իրենց աշխատանքը երիտասարդական ոլորտում, ասաց Մարագոսը։ Համագործակցելով վերոնշյալ նախարարության հետ՝ նրանք պատրաստվում են ստեղծել երիտասարդական հարթակ, որը կօգնի կյանքի կոչել Հայաստանի և ԵՄ միջև համագործակցության համաձայնագիրը։ Եվ այս շրջանակներում նրանք այժմ աշխատում են Հայաստանի բարեփոխումների, ժողովրդավարության, տնտեսության ամրապնդման ուղղությամբ, ասաց ԵՄ դեսպանը։ Վասիլիս Մարագոսը հավելեց, որ պատրաստ է տարվա ընթացքում եւս մի քանի անգամ այցելել Գավառ՝ երիտասարդների հետ քննարկելու հնարավոր միջոցառումները։