News - Միրզոյանն Ամիր-Աբդոլլահյանին կարևորել է Հայաստանի սահմանին իրավիճակի սրումը կանխելուն ուղղված ջանքերը.

Հայաստանի արտաքին գործերի նախարար Արարատ Միրզոյանը չորեքշաբթի հեռախոսազրույց է ունեցել Իրանի արտաքին գործերի նախարար Հոսեյն Ամիր-Աբդոլլահյանի հետ, հայտնում է ՀՀ արտաքին գործերի նախարարությունը։ Որպես Հայաստանի վարչապետի և Իրանի նախագահի օրեր առաջ կայացած հեռախոսազրույցի շարունակություն՝ երկու երկրների արտգործնախարարները քննարկել են Հարավային Կովկասում կայունությանն ու անվտանգությանը վերաբերող հարցեր։ Անդրադառնալով տարածաշրջանի վերջին զարգացումներին՝ ԱԳ նախարար Միրզոյանը կարևորել է գործընկերների ջանքերն ու հայտարարությունները՝ ուղղված Հայաստանի հետ սահմանին իրավիճակի սրումը զսպելու և Ադրբեջանին կառուցողական ասպարեզ վերադարձնելուն։ Տարածաշրջանում երկարաժամկետ կայունության հասնելու համատեքստում ընդգծվել է նաև Լեռնային Ղարաբաղի ժողովրդի իրավունքների և անվտանգության խնդիրների լուծման անհրաժեշտությունը։ Հեռախոսազրույցի ընթացքում կողմերը քննարկել են նաև երկկողմ հարաբերությունները։ Երկու կողմերը վերահաստատեցին իրենց պատրաստակամությունը շարունակելու երկխոսությունը տարբեր հարթակներում և ձևաչափերում։