News - Վարչապետ. Հայաստանը վաղուց պատրաստ է ԵՄ-ի հետ վիզային ռեժիմի ազատականացմանը

Ե՛վ Հունաստանում ապրող, և՛ Հայաստանում ապրող հունական համայնքը կարևոր գործոն են մեր երկկողմ հարաբերությունների ամրապնդման գործում։ Այս մասին Հունաստանի Kathimerini թերթին տված հարցազրույցում ասել է ՀՀ վարչապետ Նիկոլ Փաշինյանը։ Նրա խոսքով, «կարևոր է, որ առկա ամուր պատմական հարաբերություններն ամրապնդվեն հայերի և հույների նոր սերունդների շփումներով, և մենք պետք է քայլեր ձեռնարկենք փոխադարձ ճանաչման հնարավորություններ ստեղծելու ուղղությամբ»։ «Այս առումով ուզում եմ ընդգծել ինչպես զբոսաշրջության կարևորությունը, որը, թերեւս, լավագույն հնարավորությունն է՝ ամրապնդելու մարդկանց հարաբերությունները և համատեղ գիտակրթական ծրագրերը։ Առաջիկայում նախատեսվում է ստորագրել կրթության ոլորտում երկկողմ համագործակցության նոր ծրագիր, որը նոր հնարավորություններ կստեղծի ուսանող-դասախոսական կազմ փոխանակման համար։ Օրերս համագործակցության համաձայնագիր է ստորագրվել Հայաստանի կառավարության և Թրակիայի Դեմոկրիտ համալսարանի միջև, որտեղ գործելու է Հայոց լեզվի և մշակույթի կենտրոնը։ Առաջիկայում նախատեսվում են մի շարք այլ համատեղ նախաձեռնություններ գիտամշակութային ոլորտներում, որոնք կնպաստեն երկկողմ մշակութային կապերի ամրապնդմանը։ Անշուշտ, մարդկանց միջև շփումներն ակտիվացնելու համար անհրաժեշտ է, որ ԵՄ երկրների հետ վիզային ռեժիմի ազատականացման բանակցությունները հաջողությամբ պսակվեն։ Հայաստանը վաղուց պատրաստ է իրականացնել այս գործընթացը»,- նշել է ՀՀ վարչապետը։ Անդրադառնալով հայ-հունական հարաբերություններին՝ Նիկոլ Փաշինյանն ասաց. «Հայաստանի և Հունաստանի միջև հարաբերությունները հիմնված են ընդհանուր պատմության և երկարամյա բարեկամության, ինչպես նաև ընդհանուր արժեքներին հավատարմության վրա: Այս համատեքստում է, որ մենք դիտարկում ենք նաև հետագա երկկողմ հարաբերությունների զարգացում։ Հայաստանը կարծում է, որ իր զարգացմանը կարելի է հասնել ուղղակիորեն ժողովրդավարական ինստիտուտների կատարելագործման միջոցով, մինչդեռ մենք փորձում ենք զարգացնել մեր համագործակցությունը եվրոպական կառույցների հետ, առաջին հերթին՝ Եվրամիության հետ։ Այս ուղղությամբ Հունաստանի փորձն ու աջակցությունը մեզ համար շատ կարևոր են։ Այնպես որ, կարծում եմ, որ երկկողմ հարաբերությունների խորացումը բոլոր ուղղություններով հող կպատրաստի Հայաստանի և Հունաստանի միջև սերտ համագործակցությունը ավելի բարձր ռազմավարական մակարդակ զարգացնելու համար»։