News - Օլիվիե Դեկոտինյեն՝ Գարեգին Երկրորդին. Ֆրանսիան ջանքեր կգործադրի Ղարաբաղին անվտանգության երաշխիքներ տրամադրելու համար

Մայր Աթոռ Սուրբ Էջմիածնից NEWS.am-ին հայտնում են, որ Գարեգին Բ Ամենայն Հայոց Կաթողիկոսը չորեքշաբթի ընդունել է Հայաստանում Ֆրանսիայի նորանշանակ դեսպան Օլիվյե Դեկոտինյեին։ Գարեգին Բ-ն անդրադարձել է Հայաստանի և Ֆրանսիայի միջև առկա ջերմ հարաբերություններին և համագործակցությանը և ընդգծել, որ հայ-ֆրանսիական բարեկամական կապերի խորացմանը նպաստում է նաև Ֆրանսիայի հայ համայնքը։ Ամենայն Հայոց Կաթողիկոսն անդրադարձել է նաև Հայաստանի տարածաշրջանում տիրող ծանր իրավիճակին և իր երախտագիտությունը հայտնել Ֆրանսիայի իշխանություններին Հայաստանի և Արցախի (Լեռնային Ղարաբաղի) առջև ծառացած մարտահրավերների հաղթահարման գործում ցուցաբերած օգնության և համագործակցության համար։ Իր հերթին ֆրանսիացի դիվանագետը հաստատել է, որ Ֆրանսիան կշարունակի բազմակողմ աջակցություն ցուցաբերել Հայաստանին տարբեր ոլորտներում և ջանքեր կգործադրի Արցախին մարդասիրական օգնություն և անվտանգության երաշխիքներ տրամադրելու ուղղությամբ։