News - Նիկոլ Փաշինյանը և Ալեքսանդր Դե Կրոն քննարկել են Հայաստան-Ադրբեջան խաղաղության պայմանագրի գործընթացը

Հայաստանի վարչապետ Նիկոլ Փաշինյանը Բելգիայի մայրաքաղաք Բրյուսելում կայացած միջուկային էներգետիկայի առաջին գագաթնաժողովի շրջանակում հանդիպել է բելգիացի գործընկեր Ալեքսանդր դե Կրուի հետ։ ՀՀ վարչապետի աշխատակազմից NEWS.am-ին հայտնում են, որ զրուցակիցները քննարկել են Հայաստան-Բելգիա համագործակցությունը։ Կողմերն ընդգծեցին Հայաստանում Բելգիայի դեսպանատան բացումը և համոզմունք հայտնեցին, որ այն նոր լիցք կհաղորդի երկու երկրների միջև բազմաոլորտ համագործակցությանը։ Փաշինյանն ու Դե Կրոուն անդրադարձել են նաև Հարավային Կովկասում տիրող իրավիճակին, մասնավորապես՝ Հայաստան-Ադրբեջան խաղաղության պայմանագրի գործընթացին և տարածաշրջանային ենթակառուցվածքների ապաշրջափակման հնարավորություններին։ Բացի այդ, Նիկոլ Փաշինյանն իր բելգիացի զրուցակցին ներկայացրել է Հայաստանի կառավարության «Խաղաղության խաչմերուկ» նախագիծը և դրա սկզբունքները։ Երկուստեք ընդգծվել է նաև Հայաստանում ԵՄ դիտորդական առաքելության գործունեությունը տարածաշրջանում խաղաղության և կայունության ամրապնդման առումով։ Այնուհետև մտքեր են փոխանակվել Հայաստան-Եվրոպական միություն (ԵՄ) համագործակցության շուրջ։ Մասնավորապես, անդրադարձ է եղել ԵՄ աջակցությամբ Հայաստանում իրականացվող ժողովրդավարական բարեփոխումներին, վիզային ռեժիմի ազատականացման շուրջ երկխոսությանը։