News - Փաշինյան. Հայաստանը հարձակման է ենթարկվել որոշ արտաքին ոչ ժողովրդավարական ուժերի կողմից ռազմական, հիբրիդային միջոցներով

Հայաստանի վարչապետ Նիկոլ Փաշինյանը ելույթ է ունեցել առցանց՝ «Հանուն ժողովրդավարության» երրորդ գագաթնաժողովում։ Այս տարի միջոցառումը նախագահում է Հարավային Կորեան։ Իր խոսքում ՀՀ վարչապետը, մասնավորապես, նշել է. «Իմ պատիվն է ելույթ ունենալ հանուն ժողովրդավարության գագաթնաժողովին և կիսել Հայաստանի Հանրապետության ժողովրդավարական ձեռքբերումներն ու ձգտումները։ Ժողովրդավարական բարեփոխումների օրակարգը մնում է մեր կառավարության առաջնահերթությունը։ Արդյունքում, ըստ Freedom House-ի զեկույցների, Հայաստանը մի քանի տարի անընդմեջ դասվում է «Ազատ ինտերնետի» երկրների շարքում։ Մենք գրանցել ենք ազատության համաշխարհային ինդեքսի բարելավում՝ մեկ տարվա ընթացքում մեր դիրքերն առաջադիմելով 2 կետով։ Հայաստանը առաջընթաց է գրանցել նաև Մամուլի ազատության համաշխարհային ինդեքսում և 2023 թվականին իր դիրքերը բարելավել է 2 կետով։ Տիկնայք եւ պարոնայք, Հիմնարար հարցը, որը ծագում է ժողովրդավարական երկրներում մեր օրերում, այն է, թե արդյոք ժողովրդավարությունը կարող է ապահովել անվտանգություն և կայունություն: Վերջին մի քանի տարիների ընթացքում մենք բազմիցս զգացել ենք, թե ինչպես կարող են ժողովրդավարական ինստիտուտները ներքին կայունություն ապահովել։ Մյուս կողմից, Հայաստանը հարձակման է ենթարկվել որոշ արտաքին ոչ ժողովրդավարական ուժերի կողմից ռազմական և հիբրիդային միջոցներով, որոնք ուղղված են ոչ միայն մեր երկրի տարածքային ամբողջականությանն ու անկախությանը, այլև ժողովրդավարությանը։ Եվ մենք որոշեցինք միանալ Միջազգային քրեական դատարանին՝ պաշտպանելու մեր անկախությունը, տարածքային ամբողջականությունը և ժողովրդավարությունը: Հավատարիմ լինելով Ադրբեջանի հետ խաղաղ գործընթացին՝ Հայաստանն իր անվտանգությունն առաջին հերթին դիտարկում է տարածաշրջանում և նրա սահմաններից դուրս իր հարևանների հետ խաղաղ գոյակցության և համագործակցության մեջ: Այսպիսով, Հայաստանի Հանրապետության կառավարության կողմից ներկայացված «Խաղաղության խաչմերուկ» նախագիծը նպատակ ունի նպաստել Հարավային Կովկասի անվտանգությանը, կայունությանը և խաղաղությանը։ Այս նախագիծը համագործակցության միջոցով տարածաշրջանում կայուն խաղաղությանն ու անվտանգությանը նպաստելու իմ կառավարության հանձնառության ևս մեկ ցուցանիշ է։ Տիկնայք եւ պարոնայք, Ես վերահաստատում եմ Հայաստանի հավատարմությունը ժողովրդավարական ճանապարհին՝ ի շահ տարածաշրջանի ընդհանրապես և ի շահ Հայաստանի Հանրապետության պետականության, նրա ինքնիշխանության և միջազգային դերի»։