News - Ալիև. Ադրբեջանն ու Վրաստանը միշտ աջակցել են միմյանց ինքնիշխանությանը

Ադրբեջանն ու Վրաստանը մշտապես հանդես են եկել միմյանց ինքնիշխանության, տարածքային ամբողջականության, սահմանների անձեռնմխելիության աջակցության հայտարարություններով, ինչպես նաև աջակցել են միմյանց համապատասխան միջազգային կազմակերպություններում քվեարկության ժամանակ։ Այս աջակցությունը կշարունակվի նաև ապագայում։ Այդ մասին մարտի 16-ին հայտարարել է Ադրբեջանի նախագահ Իլհամ Ալիևը Վրաստանի վարչապետ Իրակլի Կոբախիձեի հետ անհատական ​​հանդիպումից հետո մամուլի հայտարարության ժամանակ, հաղորդում են ադրբեջանական լրատվամիջոցները: Ըստ Ալիևի՝ Ադրբեջանն ու Վրաստանն այսօր «համատեղ ջանքերով ոչ միայն ապահովում են իրենց երկրների տնտեսական զարգացումը, այլև միևնույն ժամանակ դարձել են կարևոր երկրներ տարածաշրջանի և լայն իմաստով Եվրասիայի համար»: «Մեր կողմից իրականացվող համատեղ ենթակառուցվածքային նախագծերը կարեւոր են շատ երկրների համար, այս ուղղությամբ կշարունակվեն ձեռնարկվել լրացուցիչ քայլեր»,- ասել է Ալիեւը։ Նա հավելել է, որ Վրաստանն ու Ադրբեջանը «որպես երկու անկախ պետություններ, միշտ միմյանց կողքին են»։ «Մեր բարեկամական եղբայրությունը հիմնված է պատմական խոր արմատների վրա: Դարեր շարունակ մեր ժողովուրդն ապրել է բարեկամության և բարիդրացիության պայմաններում: Այդ ամուր հիմքի վրա են կառուցված միջպետական ​​հարաբերությունները»,- ասել է Ալիևը: