News - Վարչապետն ընդունել է ԱՄՀ հայաստանյան առաքելության ղեկավարին

Վարչապետ Նիկոլ Փաշինյանն ընդունել է Արժույթի միջազգային հիմնադրամի (ԱՄՀ) հայաստանյան առաքելության ղեկավար Իվա Պետրովային։ Վարչապետի աշխատակազմից NEWS.am-ին հայտնում են, որ Փաշինյանը կարևորել է ԱՄՀ-ի հետ Հայաստանի համագործակցությունը՝ տնտեսության զարգացման և երկրում կայունության պահպանման համար։ Զրուցակիցները քննարկել են Հայաստանում հարկաբյուջետային և դրամավարկային քաղաքականության, ֆինանսական հատվածի և ներդրումային միջավայրի բարելավմանն ուղղված բարեփոխումները։ Նաև ընդգծվել է 2023 թվականի արդյունքներով Հայաստանում արձանագրված դրական մակրոտնտեսական ցուցանիշները և շեշտվել է բարեփոխումների շարունակականությունը՝ երկրում տնտեսական ակտիվությունը պահպանելու նպատակով։ Վարչապետն ընդգծել է, որ մակրոտնտեսական կայունության պահպանումը բացարձակ առաջնահերթություն է Հայաստանի կառավարության համար, և որ այդ ուղղությամբ քայլերն ու բարեփոխումները լինելու են հետևողական։ Կողմերն անդրադարձել են նաև Լեռնային Ղարաբաղից բռնի տեղահանված հայերի հումանիտար խնդիրներին և այդ խնդիրների լուծմանն ուղղված միջոցառումներին։ Այս համատեքստում Հայաստանի վարչապետն ընդգծել է միջազգային հանրության կողմից ցուցաբերվող աջակցության շարունակականության կարևորությունը։