

Կոնգրեսական Ֆրենկ Փալոնը հայտնել է, որ միանում է Ամերիկայի Հայ դատի հանձնախմբին (ANCA) և մարդու իրավունքների պաշտպաններին, որոնք կոչ են անում ԱՄՆ-ին պատասխանատվության ենթարկել Ադրբեջանի նախագահ Իլհամ Ալիևին Արցախի (Լեռնային Ղարաբաղի) հայ բնակչության նկատմամբ ցեղասպանական քաղաքականության համար։ Այս մասին X-նախկին Twitter-ում նշել է ԱՄՆ Կոնգրեսի Ներկայացուցիչների պալատի անդամ, Կոնգրեսի հայկական խմբի համանախագահ Փալոնը։ «Ես միանում եմ ANCA_DC-ին և մարդու իրավունքների պաշտպաններին՝ կոչ անելով ԱՄՆ-ին պատասխանատվության ենթարկել Ալիևին Արցախի հայ բնակչության դեմ իր ցեղասպան գործողությունների համար։ Արդեն ժամանակն է, որ Կոնգրեսը քայլեր ձեռնարկի իր ռեժիմի նկատմամբ պատժամիջոցներ կիրառելու և Ադրբեջանին անվտանգության հետագա ցանկացած օգնություն կանխելու համար»,- գրել է կոնգրեսական Փալոնը: