

Ես Եվրախորհրդարանում հայտարարեցի, որ մենք պատրաստ ենք ԵՄ-ին մոտ լինել այնքան, որքան հնարավոր է համարում ԵՄ-ն։ Սա ասվել է, և հիմա մենք պետք է իմանանք, թե ԵՄ-ն որքանով է հնարավոր համարում, հետո եզրակացություններ անենք։ Այս մասին այսօր իր ասուլիսում հայտարարեց ՀՀ վարչապետ Նիկոլ Փաշինյանը։ «Բայց կարեւոր է նաեւ, թե Հայաստանի ժողովուրդը որքանով դա հնարավոր կհամարի։ Մենք տեսնում ենք, որ մեր հարաբերությունները ԵՄ-ի հետ շատ ակտիվ են, և հիմա լավ է, որ ԵՄ-ն ասում է, որ Հայաստանի և ԵՄ հարաբերությունները երբեք այսքան խորն ու ամուր չեն եղել։ Հուսով եմ, որ մոտ ապագայում մենք կունենանք մի քանի որոշումներ, որոնք կլինեն այդ ամուր հարաբերությունների արտահայտությունը։ Չնայած, այնպես չէ, որ մինչ այժմ մենք այդ հարաբերությունները չենք ունեցել։ Ես պարզապես կարծում եմ, որ հարաբերությունները զարգանում են, և դրանք պետք է ունենան նոր արտահայտություններ և դրսևորումներ։ Այդ արտահայտություններից մեկը կարող է լինել Հայաստանի և ԵՄ-ի միջև վիզաների ազատականացման բանակցությունների մեկնարկը։ Հաջորդ թեմաներից մեկը կարող է լինել Հայաստանում արտադրվող ապրանքներին առևտրի արտոնյալ պայմանների տրամադրումը և Հայաստանի հետ տնտեսական կապերի խորացումը։ Հաջորդ արտահայտությունը կարող է լինել անվտանգության ոլորտում մեր համագործակցության և հարաբերությունների խորացումը, նաև Հայաստանում ԵՄ դիտորդական առաքելության կարողությունների ավելացումը, նաև ԵՄ դիտորդների մանդատի երկարաձգումը։ Այս պահին երկու տարի է; կարող է որոշում լինել եւս երկու տարով երկարաձգելու մասին»,- ասաց Փաշինյանը «Մենք ունենք շատ լայն օրակարգ, և մենք պատրաստ ենք այն ընդլայնել ու խորացնել: Այս պահին բավական է խոսվել նոր բան չասելու համար»,- հավելեց ՀՀ վարչապետը: