News - Վարչապետը Դանիայի պատգամավորներին ներկայացրել է Հայաստանի դիրքորոշումը Ադրբեջանի հետ խաղաղության պայմանագրի վերաբերյալ

Վարչապետ Նիկոլ Փաշինյանն ընդունել է Դանիայի խորհրդարանի արտաքին հարաբերությունների հանձնաժողովի նախագահ Լիզ Բեխի գլխավորած պատվիրակությանը։ Վարչապետը ողջունել է Դանիայի պատվիրակության այցը Հայաստան և նշել, որ երկու երկրների միջև համագործակցությունն այնքան էլ ակտիվ չէ։ Փաշինյանը հույս է հայտնել, որ այս այցը նոր լիցք կհաղորդի Հայաստան-Դանիա համագործակցությանը։ Միևնույն ժամանակ, ՀՀ վարչապետը կարևորել է երկու երկրների միջև խորհրդարանական կապերի և սերտ համագործակցության զարգացումը, այդ թվում՝ միջազգային հարթակների շրջանակներում։ Հանդիպման ընթացքում զրուցակիցներն անդրադարձել են Եվրոպական միության (ԵՄ) աջակցությամբ Հայաստանում իրականացվող ժողովրդավարական բարեփոխումներին։ Վարչապետ Փաշինյանն ընդգծել է, որ Հայաստանի կառավարության և հասարակության համար ժողովրդավարության զարգացումն ու ամրապնդումը ռազմավարական նշանակություն ունի, և համապատասխան քայլերը լինելու են հետևողական։ Կողմերը քննարկել են նաև Հայաստան-ԵՄ համագործակցությունը, Հարավային Կովկասում տեղի ունեցող գործընթացները։ Վարչապետը ներկայացրել է հայկական կողմի սկզբունքային դիրքորոշումները Ադրբեջանի հետ խաղաղության պայմանագրի ստորագրման վերաբերյալ, ինչպես նաև Հայաստանի կառավարության «Խաղաղության խաչմերուկ» նախագծի սկզբունքները։ Իսկ Հայաստանի տարածաշրջանում խաղաղության և կայունության ապահովման համատեքստում վարչապետը կարևորել է ԵՄ քաղաքացիական դիտորդական առաքելության գործունեությունը երկրում։