News - Նիկոլ Փաշինյանը Եգիպտոսի նախագահին է ներկայացրել Հայաստանի սկզբունքային դիրքորոշումները Ադրբեջանի հետ խաղաղության պայմանագրի վերաբերյալ
Business Strategy
Նիկոլ Փաշինյանը Եգիպտոսի նախագահին է ներկայացրել Հայաստանի սկզբունքային դիրքորոշումները Ադրբեջանի հետ խաղաղության պայմանագրի վերաբերյալ
Պաշտոնական այցով Եգիպտոս ժամանած ՀՀ վարչապետ Նիկոլ Փաշինյանը հանդիպել է Եգիպտոսի նախագահ Աբդել Ֆաթահ Էլ-Սիսիի հետ։ Նախ կայացել է երկու երկրների ղեկավարների առանձնազրույցը, ապա քննարկումները շարունակվել են ընդլայնված կազմով։ Եգիպտոսի նախագահը ողջունել է վարչապետ Փաշինյանի պաշտոնական այցը և ընդգծել, որ այն նոր լիցք կհաղորդի Եգիպտոսի և Հայաստանի միջև բազմաոլորտ համագործակցության զարգացմանն ու ընդլայնմանը։ Էլ-Սիսին ընդգծել է հայ և եգիպտացի ժողովուրդների դարավոր սերտ կապերի փաստը՝ հավելելով, որ Եգիպտոսի հայ համայնքը առանձնահատուկ դեր ունի տարբեր ոլորտների զարգացման գործում։ Վարչապետ Փաշինյանը շնորհակալություն է հայտնել ջերմ ընդունելության համար՝ հավելելով, որ Հայաստանի կառավարությունը շահագրգռված է Եգիպտոսի հետ հարաբերությունների ընդլայնմամբ և խորացմամբ։ Վարչապետն ընդգծել է առևտրատնտեսական համագործակցության ընդլայնումն ու խորացումը և առկա ներուժի իրացման գործում ընդգծել գործարար կապերի զարգացման անհրաժեշտությունը։ Հայաստանի վարչապետը և Եգիպտոսի նախագահը քննարկել են տնտեսության, ենթակառուցվածքների, զբոսաշրջության, ավիացիայի, բարձր տեխնոլոգիաների, գյուղատնտեսության, բնապահպանության, կրթության և մշակույթի ոլորտներում համատեղ նոր ծրագրերի իրականացման հարցը։ Զրուցակիցները քննարկել են նաև Հարավային Կովկասում և Մերձավոր Արևելքում տեղի ունեցող գործընթացները։ Երկուստեք կարեւորվել է խաղաղության ու կայունության ամրապնդումը եւ այդ ուղղությամբ հետեւողական քայլերի իրականացումը։ Վարչապետ Փաշինյանը նաև Եգիպտոսի նախագահին է ներկայացրել Հայաստան-Ադրբեջան խաղաղության պայմանագրի շուրջ ընթացող քննարկումների մանրամասները և անդրադարձել հայկական կողմի սկզբունքային դիրքորոշումներին այդ հարցում։ Անդրադարձ է եղել նաև Հայաստանի կառավարության «Խաղաղության խաչմերուկ» նախագծին և դրա սկզբունքներին։ Բացի այդ, Նիկոլ Փաշինյանը խոսել է Լեռնային Ղարաբաղից բռնի տեղահանված հայերի հումանիտար խնդիրների և այդ խնդիրների լուծման ուղղությամբ ՀՀ կառավարության կողմից ձեռնարկվող միջոցների մասին։ Նիկոլ Փաշինյանի և Աբդել Ֆաթթահ Էլ-Սիսիի հանդիպումից հետո Հայաստանի և Եգիպտոսի միջև և երկու երկրների ղեկավարների ներկայությամբ տեղի է ունեցել մի շարք փաստաթղթերի ստորագրման արարողություն։ Մասնավորապես, Հայաստանի և Եգիպտոսի միջև ստորագրվել է տնտեսական համագործակցության փոխըմբռնման հուշագիր, գյուղատնտեսության ոլորտում գիտատեխնիկական համագործակցության 2024-2026 թվականների իրականացման ծրագիր և շրջակա միջավայրի պահպանության ոլորտում համագործակցության փոխըմբռնման հուշագիր։
About usyoo
Categories
Tags
