News - Վրաստանի փոխարտգործնախարար. Հուսով ենք, որ Հայաստանը և Ադրբեջանը համաձայնության կգան

Վրաստանը շահագրգռված է Հայաստանի և Ադրբեջանի միջև խաղաղության պայմանագրի կնքման գործընթացի զարգացմամբ և վստահելի հարևաններին առաջարկում է բանակցությունների իր հարթակը։ Այս մասին Թուրքիայում Անթալիայի դիվանագիտական ​​ֆորումում հայտարարել է Վրաստանի փոխարտգործնախարար Լաշա Դարսալիան։ Նրա խոսքով, Թբիլիսիի համար կարեւոր է տարածաշրջանում խաղաղությունը, եւ վրացական կողմը հույս ունի, որ Երեւանն ու Բաքուն կհասնեն համաձայնության, որից երկու կողմերը կշահեն։ Դարսալիան նշեց, որ Վրաստանը տեսնում, գիտակցում և հաշվի է առնում որոշակի դժվարություններ, որոնք առկա են Հայաստանի և Ադրբեջանի երկկողմ բանակցություններում։ Այդ նպատակով Թբիլիսին ավելի վաղ հանդես էր եկել խաղաղ բարիդրացիության նախաձեռնությամբ և օգնություն առաջարկել երկու երկրներին բանակցություններ վարելու հարցում։ «Մեզ համար պարզ է, որ մենք պետք է խրախուսենք համագործակցությունը, այլ ոչ թե օտար խաղացողներին մեր ասպարեզ թույլ տանք»,- ասաց Վրաստանի փոխարտգործնախարարը։ Նա ընդգծել է, որ տարածաշրջանում խաղաղությունն այլընտրանք չունի, և այդ պատճառով Թբիլիսին աջակցում է Հարավային Կովկասում բանակցություններին և կայունության հաստատմանը։ «Մի քանի ամիս առաջ մենք թարմացրեցինք մեր հարաբերությունները Հայաստանի հետ՝ դրանք հասցնելով ռազմավարական գործընկերության մակարդակի, կարծում ենք, որ դա մեծ ներդրում կունենա տարածաշրջանում համագործակցության գործընթացում», - ասաց Դարսալիան։