News - Հայաստանի և Քուվեյթի ԱԳ նախարարները քննարկել են երկու երկրների միջև քաղաքական երկխոսության ընդլայնումը (ՖՈՏՈ)

Հայաստանի արտաքին գործերի նախարար Արարատ Միրզոյանն ուրբաթ օրը Թուրքիայում Անթալիայի դիվանագիտական ​​ֆորումի շրջանակներում հանդիպել է Քուվեյթի արտաքին գործերի նախարար Աբդուլլահ Ալի Ալ-Յահյային։ Հայաստանի արտաքին գործերի նախարարությունից NEWS.am -ին հայտնում են, որ նախ Միրզոյանը շնորհավորել է Ալ-Յահյային ԱԳ նախարարի պաշտոնում նշանակվելու կապակցությամբ և պատրաստակամություն հայտնել համատեղ ջանքերով հարստացնել երկկողմ օրակարգը։ Զրուցակիցները քննարկել են երկու երկրների միջև քաղաքական երկխոսության ընդլայնմանն առնչվող հարցեր՝ պատրաստակամություն հայտնելով գործնական քայլեր ձեռնարկել տարբեր ոլորտներում առկա ներուժն օգտագործելու ուղղությամբ։ Երկուստեք ընդգծվել է, որ երկու ժողովուրդների միջև բարեկամական կապերն ու շփումներն արդեն իսկ լավ հիմքեր են ստեղծել, և բարձր մակարդակի փոխայցելությունները կարող են լրացուցիչ խթան հաղորդել զարգացող օրակարգին։ Քննարկվել են նաև տարածաշրջանային անվտանգության հարցեր։ Այդ կապակցությամբ Միրզոյանն իր գործընկերոջը ներկայացրել է Հայաստան-Ադրբեջան հարաբերությունների կարգավորման գործընթացի վերջին քննարկումները։ ԱԳ նախարար Միրզոյանն ընդգծել է Հայաստանի դիրքորոշումը 1991թ. Ալմաթիի հռչակագրի հիման վրա տարածքային ամբողջականության փոխադարձ ճանաչման հստակ հանձնառության և հետագա սահմանազատման գործընթացում հնարավորինս հստակություն ապահովելու կարևորության վերաբերյալ։ Անդրադարձ է կատարվել նաև մարդասիրական խնդիրներին։ Խաղաղության օրակարգի շրջանակներում և տարածաշրջանային հաղորդակցությունների ապաշրջափակման համատեքստում Արարատ Միրզոյանը ներկայացրել է Հայաստանի կառավարության կողմից մշակված «Խաղաղության խաչմերուկ» նախագիծը, դրա տնտեսական առավելություններն ու ներդրումների հնարավորությունները։