News - Հայաստանի նախագահը և Իրաքի վարչապետը քննարկել են տարածաշրջանային ընդհանուր իրավիճակը, ներկա զարգացումները

Նախագահի գրասենյակից NEWS.am -ին հայտնում են, որ Իրաք կատարած պաշտոնական այցի շրջանակներում Հայաստանի նախագահ Վահագն Խաչատուրյանը հանդիպել է Իրաքի վարչապետ Մուհամմադ Շիա ալ-Սուդանիի հետ։ Հանդիպման ընթացքում քննարկվել են Հայաստանի և Իրաքի փոխգործակցության ներուժը տնտեսության, էներգետիկայի, բարձր տեխնոլոգիաների, էլեկտրոնային կառավարման համակարգերի, զբոսաշրջության, առողջապահության և մի շարք այլ ոլորտներում, ինչպես նաև այդ ներուժի իրացման ուղղությամբ քայլերի ակտիվացման անհրաժեշտությունը։ Կողմերը նաև բարձր են գնահատել իրաքահայ համայնքի դերը երկու երկրների և ժողովուրդների փոխադարձ ճանաչման գործում, ինչը կարևոր հիմք է հարաբերությունների հետագա ամրապնդման համար։ Երկուստեք ընդգծվել է երկու ժողովուրդների պատմամշակութային սերտ հարաբերությունները, ինչը նպաստում է բարեկամության և գործընկերության շարունակական զարգացմանը։ Հանդիպմանը մտքեր են փոխանակվել նաև տարածաշրջանային ընդհանուր իրավիճակի և ընթացիկ զարգացումների շուրջ։ Այս կապակցությամբ զրուցակիցներն ընդգծել են առկա խնդիրներն ու մարտահրավերները խաղաղ բանակցությունների միջոցով և միջազգային հիմնարար իրավունքների ու նորմերի գերակայության շրջանակներում լուծելու հրամայականը։