News - Գերմանիայի պատգամավոր. Մենք պատրաստ ենք աջակցել Հայաստանում խաղաղ գործընթացին

Գերմանական կողմից մենք պատրաստ ենք մեր աջակցությունը ցուցաբերել ինչպես տարածաշրջանում խաղաղ գործընթացին, այնպես էլ Հայաստանում տեղի ունեցող բարեփոխումներին։ Այս մասին երեքշաբթի օրը Հայաստանում Գերմանիայի դեսպանատանը հրավիրված ասուլիսի ժամանակ հայտարարեց Գերմանիայի Բունդեսթագի, խորհրդարանի իրավական հարցերի հանձնաժողովի նախագահ Էլիզաբեթ Վինկելմայեր-Բեքերը։ Նրա խոսքով, Գերմանիան դրական է գնահատում արևմտյան ժողովրդավարական արժեքների որդեգրմանն ուղղված հայկական կողմի ջանքերը։ Վինկելմայեր-Բեքերը երկուշաբթի հանդիպել է Հայաստանի վարչապետի, ներքին գործերի նախարարի, Սահմանադրական դատարանի նախագահի և անդամների, արդարադատության նախարարի, ինչպես նաև մարդու իրավունքների պաշտպանի հետ։ «Մեր շահերի հիմքում իրավական համագործակցությունն է և քաղաքացիների և պետությունների միջև հարաբերություններին առնչվող իրավական հարցերը: Հայաստանում մեր հանդիպումների ընթացքում մենք կարողացանք մեծ հետաքրքրությամբ հետևել բոլոր այն զարգացումներին, որոնք ձեր երկիրը տանում են դեպի կայուն ժողովրդավարություն», - ասաց նա: Գերմանացի պատգամավոր. Վինքելմայեր-Բեքերի խոսքով, վերոհիշյալ հանդիպումներից ինքը տպավորություն է ստացել, որ Հայաստանը վճռական է շարունակելու ժողովրդավարության ուղին, մասնավորապես նպաստելու պետության և քաղաքացիների միջև հարաբերությունների օրինականության բարձրացմանը։ Գերմանիայի Բունդեսթագի իրավական հարցերի հանձնաժողովի նախագահը Հայաստան այցը սկսել էր Խոր Վիրապի վանական համալիր այցելությամբ, ծանոթացել Հայաստանի դարավոր պատմությանն ու մշակույթին, ապա այցելել Հայոց ցեղասպանության հուշահամալիր և թանգարան։ Երևանում ևս մեկ անգամ առնչվելու Հայաստանի պատմության ողբերգական դրվագներից մեկին. Էլիզաբեթ Վինկելմայեր-Բեքերը հիշեց, որ տարիներ առաջ Գերմանիայի Բունդեսթագը Հայոց ցեղասպանությունը ճանաչող բանաձեւ էր ընդունել։