News - Ալեքսեյ Նավալնիի հրապարակային հրաժեշտը նախատեսված է շաբաթվա վերջին

Փետրվարի 16-ին Ռուսաստանի քրեակատարողական գաղութում մահացած ընդդիմադիր գործիչ Ալեքսեյ Նավալնիին հանրային հրաժեշտը նախատեսվում է անցկացնել այս աշխատանքային շաբաթվա վերջին. այն է՝ մինչև ուրբաթ օրը, ինչպես հայտնել է Նավալնիի մամուլի քարտուղար Կիրա Յարմիշը։ «Մենք դահլիճ ենք փնտրում Ալեքսեյին հրապարակավ հրաժեշտ տալու համար: Ժամը՝ այս աշխատանքային շաբաթվա ավարտը: Եթե ունեք հարմար տարածքներ, խնդրում ենք կապվել մեզ հետ», - գրել է Յարմիշը X-նախկին Twitter-ում: Ալեքսեյ Նավալնիի մարմինը փետրվարի 24-ին՝ քաղաքական գործչի մահից իններորդ օրը, հանձնվել է մորը՝ Լյուդմիլա Նավալնայային։ Ռուսական իշխանությունները ավելի վաղ հրաժարվել էին դիակը հանձնել՝ պատճառաբանելով, որ հետաքննություն է իրականացվում։ Ալեքսեյ Նավալնիի հարազատները հայտնել են, որ ՌԴ Քննչական կոմիտեի ներկայացուցիչներն ասել են, որ Լյուդմիլա Նավալնայային կտրվի որդու մարմինը, եթե նա համաձայնի թաղել նրան գաղտնի և առանց հրապարակային հրաժեշտի։ Նավալնիի մայրը, սակայն, հրաժարվել է կատարել այս պահանջները։ ՌԴ նախագահի մամուլի քարտուղար Դմիտրի Պեսկովը հայտարարել է, որ Կրեմլը ճնշում չի գործադրել Ալեքսեյ Նավալնիի մոր վրա՝ կապված նրա առաջիկա հուղարկավորության հետ։ Բացի այդ, Պեսկովն ասել է, որ նախագահ Վլադիմիր Պուտինը մարմնի արտահանձնման վերաբերյալ որոշում չի կայացրել, քանի որ «պետության ղեկավարը ոչ մի կերպ չի կարգավորում այդ հարցերը»։