News - Փաշինյանը AWS-ի փոխնախագահների հետ քննարկել է թվայնացման ոլորտում համագործակցությունը

Վարչապետ Նիկոլ Փաշինյանը Մյունխենում հանդիպել է Amazon Web Services-ի փոխնախագահներ Մայքլ Պանկին և Մաքս Պետերսոնին։ Կառավարության լրատվական ծառայությունից NEWS.am -ին հայտնեցին, որ քննարկվել են ՀՀ կառավարության և Amazon Web Services-ի համագործակցությանը, համատեղ ծրագրերի իրականացմանը վերաբերող հարցեր։ Ընկերության ներկայացուցիչներն ընդգծել են Հայաստանի հետ համագործակցությունը զարգացնելու և առավել ամրապնդելու իրենց պատրաստակամությունը և հավելել, որ գտնվում են Բարձր տեխնոլոգիական արդյունաբերության նախարարության հետ քննարկումների և երկխոսության փուլում։ Հանդիպման ընթացքում, մասնավորապես, անդրադարձ է կատարվել թվայնացման ոլորտում ծրագրերի իրականացմանն ու այս ուղղությամբ նախատեսվող ապագա համատեղ աշխատանքներին։ Վարչապետ Փաշինյանն ընդգծել է, որ թվայնացման աշխատանքները Հայաստանի կառավարության առաջնահերթություններից են և ընդգծել այս ուղղությամբ սերտ համագործակցության կարևորությունը։ Վարչապետ Փաշինյանը մասնակցել է նաև «Թվային վստահությունը և կառավարության շարունակականությունը. Ամպային հաշվարկը փոփոխվող աշխարհաքաղաքականության դարաշրջանում» կլոր սեղան-քննարկմանը, որն անցկացվել է փակ դռների հետևում։ Միջոցառումը կազմակերպվել է Amazon Web Services-ի և Մյունխենի անվտանգության համաժողովի կողմից։