News - Նիկոլ Փաշինյանը ՎԶԵԲ նախագահի հետ քննարկել է երկկողմ համագործակցությանն առնչվող հարցեր

Վարչապետ Նիկոլ Փաշինյանը Մյունխենի անվտանգության համաժողովի շրջանակում հանդիպել է Վերակառուցման և զարգացման եվրոպական բանկի նախագահ Օդիլ Ռենո-Բասոյի հետ։ Կառավարության լրատվական ծառայությունից NEWS.am -ին հայտնում են, որ վարչապետը կարևորել է ՎԶԵԲ-ի տարեկան ժողովն այս տարվա մայիսին Երևանում անցկացնելու որոշումը և վստահություն հայտնել, որ այն կանցկացվի բարձր մակարդակով։ Նիկոլ Փաշինյանն ընդգծել է Հայաստանի կառավարության և ՎԶԵԲ-ի միջև ձևավորված սերտ և արդյունավետ համագործակցությունը, որի արդյունքում մեր երկրում բազմաթիվ ծրագրեր են իրականացվում տարբեր ոլորտներում։ Վարչապետի խոսքով, այս համագործակցությունը նպաստել է նաև Հայաստանի տնտեսության կայունությանն ու զարգացմանը։ ՎԶԵԲ նախագահը նաև գոհունակություն է հայտնել Հայաստանի կառավարության հետ համագործակցությունից և հավելել, որ համատեղ ծրագրերը շարունակաբար ընդլայնվում են։ Տիկին Բասսոն ընդգծել է ենթակառուցվածքների զարգացման, ճանապարհաշինության, մասնավոր հատվածի և այլ ուղղություններով ծրագրերի իրականացումը և նշել, որ ՎԶԵԲ-ը պատրաստ է ընդլայնել երկկողմ համագործակցությունը։ Հանդիպմանը զրուցակիցները քննարկել են հետագա համագործակցությանն առնչվող տարբեր հարցեր։