News - Հայաստանի վարչապետն ընդգծել է Հունաստանի հետ համագործակցության շարունակական զարգացումը

Վարչապետ Նիկոլ Փաշինյանն ընդունել է Հունաստանի դեսպան Խրիստոս Սոֆյանոպուլոսին, ով նոր է իր դիվանագիտական ​​առաքելությունը ստանձնել Հայաստանում, հայտնում է վարչապետի մամուլի ծառայությունը։ Վարչապետը շնորհավորել է դեսպանին նշանակման կապակցությամբ և արդյունավետ աշխատանք մաղթել Հայաստան-Հունաստան բարեկամական հարաբերությունների հետագա զարգացման և ամրապնդման համար։ Փաշինյանն ընդգծել է բոլոր ոլորտներում երկու երկրների համագործակցության շարունակական զարգացումը, այդ թվում՝ առևտրատնտեսական կապերի ընդլայնումը, ինչպես նաև համատեղ նոր նախագծերի իրականացումը։ Նշելով, որ Հունաստանի հետ Հայաստանն ունի լիարժեք օրակարգ, դրա իրականացման համատեքստում վարչապետն ընդգծել է երկու երկրների կառավարությունների ակտիվ և ինտենսիվ համագործակցությունը։ Զրուցակիցները քննարկել են առաջիկայում բարձր մակարդակի փոխայցելությունների կազմակերպումը, Հայաստան-Հունաստան բազմաոլորտ համագործակցության օրակարգը, Հայաստան-Եվրամիություն համագործակցությունը, Հայաստանում իրականացվող ժողովրդավարական բարեփոխումները, Հարավային Կովկասում ընթացող գործընթացները։ Կարծիքներ են փոխանակվել նաև փոխադարձ հետաքրքրություն ներկայացնող մի շարք այլ թեմաների շուրջ։