News - Հայաստանի էկոնոմիկայի նախարարը և ANDRITZ Hydro-ի պաշտոնյան քննարկել են հանքարդյունաբերության, էներգետիկայի ոլորտում համագործակցության հնարավորությունները (ֆոտո)

ՀՀ էկոնոմիկայի նախարար Վահան Քերոբյանը երեքշաբթի ընդունել է ANDRITZ Hydro ընկերության Կենտրոնական և Արևելյան Եվրոպայի, Ռուսաստանի, ԱՊՀ երկրների շուկայի կառավարման փոխնախագահ Նորբերտ Շվարցին։ ANDRITZ Hydro-ն էլեկտրամեխանիկական սարքավորումների և հիդրոէլեկտրակայանների ամբողջական ծառայությունների համաշխարհային մատակարար է: Այն մշակում է երկարաժամկետ, էկոլոգիապես մաքուր և տնտեսապես արդյունավետ լուծումներ հիդրավլիկ էներգիայի արտադրության համար: Հայաստանի էկոնոմիկայի նախարարությունից NEWS.am -ին հայտնում են, որ հանդիպման ընթացքում քննարկվել են հանքարդյունաբերության, մետալուրգիայի, էներգետիկայի, կանաչ ջրածնի արտադրության ոլորտներում համագործակցության հնարավորությունները։ Քերոբյանը ներկայացրել է նաև Հայաստանի տնտեսության արդիականացման միջոցը, որի շրջանակներում գործարարները կարող են արդիականացնել իրենց արտադրական հզորությունները։