News - Այսօր Բրյուսելում տեղի կունենա ԵՄ-Հայաստան Գործընկերության խորհրդի նիստը

ԵՄ-Հայաստան Գործընկերության խորհրդի հինգերորդ հանդիպումը տեղի կունենա երեքշաբթի Բրյուսելում՝ տեղական ժամանակով ժամը 11:30-ին, և կքննարկվեն երկկողմ հարաբերություններին և քաղաքական հարցերին, նշվում է Եվրոպական խորհրդի հայտարարության մեջ։ «ԵՄ-ն և Հայաստանը մտքեր կփոխանակեն ԵՄ-Հայաստան Համապարփակ և ընդլայնված գործընկերության համաձայնագրի և ԵՄ-Հայաստան Գործընկերության առաջնահերթությունների իրականացման վիճակի, ինչպես նաև ԵՄ-Հայաստան Գործընկերության ավելի հավակնոտ օրակարգի շարժման հնարավորության շուրջ: Նրանք նաև կքննարկեն քաղաքական երկխոսությունը և բարեփոխումները, ժողովրդավարությունը, օրենքի գերակայությունը և մարդու իրավունքները, տնտեսական, առևտրային և ոլորտային համագործակցությունը, ինչպես նաև միգրացիան, շարժունակությունը և վիզայի ազատականացման երկխոսության մեկնարկի հեռանկարները: «Այնուհետև մասնակիցները կարծիքներ կփոխանակեն քաղաքական հարցերի, ներառյալ տարածաշրջանային հարցերի և արտաքին և անվտանգության քաղաքականության վերաբերյալ: Գործընկերության խորհուրդը կնախագահի արտաքին գործերի և անվտանգության քաղաքականության գերագույն ներկայացուցիչ պարոն Ժոզեպ Բորելը։ Հայկական պատվիրակությունը կգլխավորի Հայաստանի Հանրապետության արտաքին գործերի նախարար Արարատ Միրզոյանը»,- ասվում է հաղորդագրության մեջ։ Հանդիպումից հետո նախատեսվում է Բորելի և Միրզոյանի համատեղ մամուլի ասուլիսը։