News - Հայաստանի ընդդիմադիր պատգամավոր. Այսօրվա իշխանությունները գնում են 3-րդ հանրապետության վերացման ուղղությամբ

Վարչապետ Նիկոլ Փաշինյանը և նրա ռեժիմը ցանկանում են Հայաստանը դարձնել իշխող «Քաղաքացիական պայմանագիր» կուսակցության պետություն՝ առանց ազգային իղձերի, նպատակների, հայ ժողովրդի ինքնության պահպանման. սա է այս իշխանությունների բանաձեւը։ Այս մասին հինգշաբթի ԱԺ-ում լրագրողների հետ զրույցում ասաց ԱԺ ընդդիմադիր «Հայաստան» խմբակցության քարտուղար Արծվիկ Մինասյանը՝ խոսելով Հայաստանի նոր սահմանադրություն ընդունելու գործող իշխանությունների նախաձեռնության մասին։ Նրա համոզմամբ՝ Հայաստանի իշխանությունների՝ նոր սահմանադրություն ընդունելու որոշումը պարտադրվել է Ադրբեջանի և Թուրքիայի կողմից, և եթե իշխանությունները գնան այդ քայլին, դա կնշանակի, որ նրանք ենթարկվում են հակառակորդի առաջարկած խաղի կանոններին։ Ըստ Մինասյանի՝ իշխանությունների նման քայլերը կբերեն Հայաստանի երրորդ Հանրապետության վերացմանը. «Սարսափելի է գիտակցել, որ այսօրվա իշխանությունները փորձում են ժխտել նաև Հայաստանի երրորդ Հանրապետության պետականության հիմքերը, պետությունը նման է կոնկրետ հիմքերի վրա կառուցված շինության՝ հիմնված ազգային իղձերի, նպատակների, մեր պատմական անցյալի, իրավունքների վրա. Անկախության հռչակագրում արտահայտված միջազգային ստանդարտով սահմանված սկզբունքները, եթե հիմքը փոխում ես, նշանակում է շենքը քանդում ես, հիմքը չես կարող փոխել, [բայց] թող շենքը լինի։ Այսօրվա իշխանությունները գնալով երրորդ հանրապետության վերացմանը»,- ասաց Արծվիկ Մինասյանը։