News - Ադրբեջանի նախագահը սահմանադրությամբ շանտաժի է ենթարկում Հայաստանին

Խաղաղության կարելի է հասնել այն դեպքում, երբ Հայաստանը փոփոխություններ կատարի իր սահմանադրության մեջ և այլ նորմատիվ իրավական փաստաթղթերում, ասել է Ադրբեջանի նախագահ Իլհամ Ալիևը, հաղորդում է APA-ն։ Ադրբեջանի և Հայաստանի միջև արդեն դե ֆակտո խաղաղություն է, և երկու երկրների սահմանին արդեն մի քանի ամիս է, ինչ խաղաղ իրավիճակ է տիրում, ասել է Ալիևը՝ ընդունելով Միջխորհրդարանական միության ներկայիս գլխավոր քարտուղար Մարտին Չունգոնգին։ Ալիեւն ասել է, որ այդ գործընթացի տրամաբանական ավարտի համար անհրաժեշտ է «ստորագրել խաղաղության պայմանագիր եւ վերջ դնել Ադրբեջանի նկատմամբ Հայաստանի տարածքային հավակնություններին»։ Նշենք, սակայն, որ Ադրբեջանի օրենսդրության մեջ հավակնությունները պահպանվում են Հայաստանի գրեթե ողջ տարածքի նկատմամբ։ Ալիևը նաև սպառնացել է, որ եթե Եվրախորհրդի խորհրդարանական վեհաժողովում (ԵԽԽՎ) ադրբեջանական պատվիրակության իրավունքները չվերականգնվեն, Ադրբեջանի մասնակցությունը ԵԽ-ում և Մարդու իրավունքների եվրոպական դատարանում կվերանայվի։