News - Ադամովան՝ Փաշինյանին. Չեխիան մեծ նշանակություն է տալիս Հայաստանի հետ բազմաոլորտ համագործակցությանը

Վարչապետ Նիկոլ Փաշինյանը չորեքշաբթի հյուրընկալել է Չեխիայի Հանրապետության խորհրդարանի Պատգամավորների պալատի նախագահ Մարկետա Պեկարովա Ադամովայի գլխավորած պատվիրակությանը։ Այս մասին հայտնում են վարչապետի աշխատակազմից։ Վարչապետն ընդգծել է Պեկարովա Ադամովայի այցը Հայաստան՝ ընդգծելով Հայաստան-Չեխիա հարաբերությունների շարունակական զարգացման կարևորությունը։ Այս առնչությամբ Փաշինյանը նշել է, որ երկկողմ բարձր մակարդակի փոխայցելությունները նոր ազդակ են հաղորդում փոխգործակցությանը և նպաստում երկու երկրների հարաբերությունների ընդլայնմանը։ Վարչապետն ընդգծել է նաև խորհրդարանական սերտ համագործակցության կարևորությունը, այդ թվում՝ միջազգային կազմակերպությունների շրջանակներում։ Պեկարովա Ադամովան, իր հերթին, ընդգծել է, որ Չեխիան նույնպես մեծ նշանակություն է տալիս Հայաստանի հետ բազմաոլորտ համագործակցությանը և նշել, որ դրա զարգացմանը նպաստել է վարչապետ Փաշինյանի 2023 թվականին Չեխիա կատարած պաշտոնական այցը։ Զրուցակիցները քննարկել են հայ-չեխական հարաբերությունների օրակարգը՝ ուղղված քաղաքական, տնտեսական, հումանիտար կապերի ընդլայնմանը, համատեղ նախագծերին։ Մտքեր են փոխանակվել նաև Հայաստանի տարածաշրջանում անվտանգության և կայուն խաղաղության հաստատման հեռանկարի շուրջ, և վարչապետն ընդգծել է այդ ուղղությամբ երկրի առանցքային մոտեցումները։