News - Հունաստանի կառավարությունը պատրաստ է աջակցել Հայաստանին բոլոր հնարավոր ուղղություններով Իոաննիս Պլաքիոտակիս.

Հունաստանում ՀՀ դեսպանությունից NEWS.am -ին հայտնում են, որ Հունաստանում ՀՀ դեսպան Տիգրան Մկրտչյանը հանդիպել է Հունաստանի խորհրդարանի առաջին փոխնախագահ Իոաննիս Պլաքիոտակիսի հետ։ Դեսպանն իր երախտագիտությունն է հայտնել Հունաստանի խորհրդարանում Հունաստան-Հայաստան բարեկամության խմբի ձևավորման համար և ընդգծել երկու բարեկամական խմբերի արդյունավետ գործունեությունը և խորհրդարանական դիվանագիտության գործիքների արդյունավետ օգտագործումը։ ՀՀ դեսպանն իր զրուցակցին ներկայացրել է նաև տարածաշրջանային վերջին զարգացումները, Հայաստան-Ադրբեջան բանակցային գործընթացի ներկա վիճակը, կարևորել ԵՄ դերը տարածաշրջանում խաղաղության և կայունության հաստատման գործում։ Այս համատեքստում դեսպանը շնորհակալություն է հայտնել Հունաստանին և Եվրամիությանը՝ Լեռնային Ղարաբաղից բռնի տեղահանված հայերի կարիքներին աջակցելու համար։ Անդրադառնալով հայ-հունական երկկողմ հարաբերություններին՝ դեսպան Մկրտչյանը կարևորել է տնտեսական հարաբերություններին նոր լիցք հաղորդելն ու փոխայցելությունների ակտիվացումը։ Հունաստանի խորհրդարանի փոխխոսնակն իր հերթին նշել է երկու երկրների միջև համագործակցության բարձր մակարդակը և ընդգծել, որ Հունաստանի կառավարությունը պատրաստ է աջակցել Հայաստանին բոլոր հնարավոր ուղղություններով։ Անդրադառնալով տարածաշրջանային զարգացումներին՝ օրենսդիր մարմնի փոխխոսնակը վերահաստատել է Հունաստանի դիրքորոշումը, դատապարտել բռնության բոլոր դրսեւորումները Լեռնային Ղարաբաղի համատեքստում, մտահոգություն հայտնել ծագած հումանիտար խնդիրների լուծման վերաբերյալ և միանշանակ աջակցություն հայտնել տարածքային ամբողջականությանն ու ինքնիշխանությանը։ Հայաստանի. Պլաքիոտակիսը նաև գոհունակություն է հայտնել Կիպրոսի հարցում Հայաստանի ցուցաբերած հաստատակամ աջակցության կապակցությամբ։