News - Փոխարտգործնախարար. Հայաստանը դեռ չի ստորագրել ՀԱՊԿ ամփոփ փաստաթղթերը

Հայկական կողմը դեռ չի ստորագրել Հավաքական անվտանգության պայմանագրի կազմակերպության (ՀԱՊԿ) ամփոփ փաստաթղթերը, որոնք ընդունվել են անցյալ տարի Մինսկում կայացած ՀԱՊԿ գագաթնաժողովում։ Այս մասին երկուշաբթի լրագրողներին հայտնեց ՀՀ փոխարտգործնախարար Վահան Կոստանյանը՝ հավելելով, որ այս փաստաթղթերի շուրջ քննարկումները դեռ շարունակվում են։ Իսկ լրագրողի հարցին, թե ինչն է անհանգստացնում Հայաստանին այս առումով, Կոստանյանն արձագանքեց. «Դա չի անհանգստացնում, քննարկման փուլում է»։ Այդ փաստաթղթերի փաթեթն ընդունվել է անցած նոյեմբերին Բելառուսի մայրաքաղաք Մինսկում, որտեղ անցկացվել է ՀԱՊԿ գագաթնաժողովը։ Բայց այդ փաստաթղթերի վրա Հայաստանի ստորագրությունը չկա, քանի որ հայկական պատվիրակությունը չէր մասնակցել այս գագաթնաժողովին։