News - ԵԽԽՎ նիստի ժամանակ հայ պատգամավորը հարց է ուղղում Կիպրոսի նախագահին

Եվրոպայի խորհրդի խորհրդարանական վեհաժողովում (ԵԽԽՎ) Հայաստանի Ազգային ժողովի պատվիրակությունը հունվարի 21-27-ը մասնակցում է Ֆրանսիայի Ստրասբուրգ քաղաքում անցկացվող ԵԽԽՎ տարեկան նստաշրջանի առաջին հատվածին։ ԱԺ-ից հայտնեցին, որ հերթական նիստում Հայաստանի պատվիրակ Սոնա Ղազարյանը հարց է ուղղել Կիպրոսի նախագահ Նիկոս Խրիստոդուլիդեսին։ «Ձերդ գերազանցություն, Պատիվ է ողջունել ձեզ այս վեհաժողովում: Վերջերս Հայաստանի կառավարությունը հանդես եկավ «Խաղաղության խաչմերուկ» նախաձեռնությամբ, որը վերաբերում է ենթակառուցվածքների ապաշրջափակմանը, տարածաշրջանում փոխկապակցվածության բարձրացմանը։ Այս նախագիծը մեծապես կնպաստի բարգավաճմանը, կայուն խաղաղությանը և համագործակցությանը մեր տարածաշրջանների և նրա սահմաններից դուրս գտնվող ազգերի միջև: Պարոն նախագահ, ինչպե՞ս է Կիպրոսը մտածում այս նախագծի մասին։ Շնորհակալություն»,- ասաց Ղազարյանը։ «Այժմ, ինչ վերաբերում է հայկական առաջարկին, ապա մենք՝ Կիպրոսի Հանրապետությունը, այլ կերպ ասած, աջակցում ենք այս կոնկրետ ջանքերին», - պատասխանեց նախագահ Նիկոս Խրիստոդուլիդեսը. «Ցանկացած ջանք, որը ներառում է երկրների միջև համագործակցություն, մենք աջակցում ենք դրան: Մենք զգում ենք, որ այն ճիշտ ուղղությամբ է՝ խաղաղության խաչմերուկ»։