

Բիբլոս Բանկ Արմենիան կհովանավորի CaseKey Business Case Competition-ի հավաքական թիմի մասնակցությունը Բուդապեշտի CUBE 2024-ին՝ Corvinus University-ի բիզնես գործերի մրցույթին, այս տարվա գարնանը: Ամիսներ տեւած նախապատրաստական աշխատանքներից հետո CaseKey 2023 Gala-ի գլխավոր գործի եզրափակիչ փուլ անցած մասնակիցներից ընտրվեցին 4 մասնակիցներ՝ ելնելով բիզնես գործերի միջազգային մրցույթի պահանջներից: Նրանց հետ Բուդապեշտ կմեկնեն նաեւ երկու մարզիչ։ Ապրիլի 4-11-ը կայանալիք մրցույթի ընթացքում թիմերը կլուծեն 3 գործ՝ կենտրոնանալով ընդհանուր բիզնես ռազմավարության վրա։ Ակնկալվում է, որ CUBE 2024-ին կմասնակցեն 20 թիմեր աշխարհի տարբեր համալսարաններից: Մրցույթին միշտ մասնակցում են առաջատար ընկերություններ Արևելյան և Կենտրոնական Եվրոպայից, և նրանց կողմից ներկայացված բիզնես գործերը լուծվում են մրցույթի մասնակիցների կողմից՝ յուրաքանչյուրը առավելագույնը 20 ժամվա ընթացքում: CaseKey թիմը Հայաստանից արդեն 4-րդ անգամ կմիանա բիզնես գործերի միջազգային մրցույթին, այդ թվում՝ 2 անգամ ԱՄՆ Ֆլորիդայում և մեկ անգամ՝ Դանիայի Կոպենհագենում։ Բիբլոս Բանկ Արմենիան իր ԿՍՊ ծրագրերը պլանավորելիս կենտրոնանում է հատկապես կրթության վրա, և CaseKey 2023-ն ընտրվել է որպես հետաքրքիր նախագիծ, որը սովորեցնում է գործնական հմտություններ: Մրցույթի ողջ ընթացքում Բանկը մշտապես աջակցել է մասնակիցներին՝ նպաստելու նրանց կարողությունների զարգացմանը: Հիշեցնենք, որ CaseKey մրցույթը յուրահատուկ ձևաչափ է, որի տիտղոսային հովանավորը 2023 թվականին Բիբլոս Բանկ Արմենիան էր։ Ավելի քան 200 խելացի երիտասարդներ մասնակցել են CaseKey 2023-ին՝ ծանոթանալով ընկերությունների բիզնեսին, նրանց մշակույթին և լուծելով արդի բիզնեսի խնդիրները։