News - Իրանի ԱԳ նախարարը Հայաստանի նախագահին.

Հայաստանի նախագահի հետ հանդիպման ժամանակ Իրանի արտաքին գործերի նախարարն ընդգծել է պատմական հաղորդակցության ուղիների պահպանման կարևորությունը և Կովկասում ընթացող զարգացումներում աշխարհաքաղաքական փոփոխությունների անթույլատրելիությունը։ Հայաստանում Իրանի դեսպանությունից NEWS.am -ին հայտնում են, որ Իրանի ԱԳ նախարար Հոսեյն Ամիր-Աբդոլլահյանը Շվեյցարիայի Դավոս քաղաքում ընթացող Համաշխարհային տնտեսական համաժողովի շրջանակում հանդիպում և քննարկում է ունեցել Հայաստանի նախագահ Վահագն Խաչատուրյանի հետ։ Անդրադառնալով Հայաստան կատարած իր վերջին այցին, ինչպես նաև ԱԳ նախարարի և Հայաստանի Անվտանգության խորհրդի քարտուղարի հետ ունեցած հանդիպումներին ու քննարկումներին՝ Իրանի ԱԳ նախարարն ընդգծել է, որ Հայաստանը կարևոր և առանձնահատուկ տեղ ունի հարևան երկրների հետ Իրանի քաղաքականության մեջ։ Նշելով երկու ժողովուրդների սերտ հարաբերությունները՝ Ամիր-Աբդոլլահյանն ասաց. «Մեր գնահատականն այն է, որ երկու երկրների հարաբերությունները առաջընթաց են ապրում, և այդ հարաբերությունների ամրապնդումն ապահովում է երկու ժողովուրդների շահերը»։ Իրանի արտաքին գործերի նախարարը կարևոր համարեց Կովկասում կայունության և անվտանգության պահպանումը և ընդգծեց. տարածաշրջանը տարածաշրջանային լուծումների միջոցով»։ Նա հատկապես կարևորել է պատմական հաղորդակցության ուղիների պահպանումը և աշխարհաքաղաքական փոփոխությունների անթույլատրելիությունը Կովկասում ընթացող զարգացումներում։ Ամիր-Աբդոլլահյանը, անդրադառնալով Իրանի հեղափոխության գերագույն առաջնորդի կողմից Հայաստանին տրված «լավ հարեւան» կոչմանը, նշել է. «Մենք [այսինքն՝ Իրանը] Հայաստանի հետ հարաբերությունների զարգացման որեւէ սահմանափակում չունենք»։ Հանրապետության նախագահ Վահագն Խաչատուրյանն իր հերթին գոհունակություն է հայտնել երկու երկրների միջև առկա բարեկամական և կառուցողական հարաբերությունների կապակցությամբ և ընդգծել երկու ժողովուրդների պատմական կապերը և նրանց ազդեցությունն ու դրական դերը բարեկամական հարաբերությունների և երկկողմ համագործակցության ընդլայնման գործում։ Նա հատկապես նշել է. «Այս բարեկամությունը պետք է փոխանցվի երկու երկրների ապագա սերունդներին»։ Հայաստանի նախագահը նաև կոչ է արել ամրապնդել համագործակցությունը երկու երկրների մասնավոր հատվածների և ընկերությունների միջև։ Բացի այդ, նա կարևոր է համարել երկու երկրների միջև փոխգործակցության ամրապնդումը տրանսպորտի և տարանցման ոլորտում։ Վահագն Խաչատուրյանը նաև բարձր է գնահատել Իրանի աջակցությունը Կովկասում խաղաղության և կայունության հաստատման գործընթացին։