News - Հայաստանի ֆինանսական ցուցանիշները վերջին տարիներին տպավորիչ են եղել, ասում է Արժույթի միջազգային հիմնադրամի ղեկավարը

ՀՀ նախագահ Վահագն Խաչատուրյանը Շվեյցարիայի Դավոս քաղաքում Համաշխարհային տնտեսական համաժողովի շրջանակում հանդիպել է Արժույթի միջազգային հիմնադրամի (ԱՄՀ) գործադիր տնօրեն Քրիստալինա Գեորգիևային։ Նախագահի աշխատակազմից NEWS.am-ին հայտնում են, որ զրույցի ընթացքում նախագահը բարձր է գնահատել ԱՄՀ-ի հետ Հայաստանի արդյունավետ համագործակցությունը և վստահություն հայտնել, որ այդ համագործակցությունը շարունակական է լինելու։ Իր խոսքում ԱՄՀ-ի գործադիր տնօրենն ընդգծել է Հայաստանի վերջին տարիների տպավորիչ ֆինանսական ցուցանիշները և ընդգծել, որ երկրի տարածաշրջանում կայուն և վերջնական խաղաղություն հաստատելու դեպքում տնտեսական աճի ավելի լայն հնարավորություններ և ոլորտներ կարձանագրվեն։ Հանդիպման ընթացքում կողմերը մտքեր են փոխանակել նաև առկա մարտահրավերների և համաշխարհային տնտեսության զարգացման ու առաջընթացի վրա դրանց ազդեցության վերաբերյալ։