News - Հայաստանի նախագահը ՄԱԿ-ի փախստականների հարցերով գերագույն հանձնակատարին է ներկայացրել ղարաբաղցիների խնդիրները

Հայաստանի նախագահ Վահագն Խաչատուրյանը Շվեյցարիայի Դավոս քաղաքում Համաշխարհային տնտեսական համաժողովի շրջանակում հանդիպել է ՄԱԿ-ի փախստականների հարցերով գերագույն հանձնակատար Ֆիլիպո Գրանդիի հետ։ Նախագահի աշխատակազմից NEWS.am-ին հայտնում են, որ զրույցի ընթացքում Հայաստանի և Գերագույն հանձնակատարի գրասենյակի միջև ավելի քան 30-ամյա արդյունավետ համագործակցությունը դրական է գնահատվել երկու կողմերի կողմից։ Հանդիպման ընթացքում անդրադարձ է կատարվել 2023 թվականի սեպտեմբերին Լեռնային Ղարաբաղից բռնի տեղահանված հայերի հումանիտար և սոցիալական խնդիրներին և այդ խնդիրների լուծմանն ուղղված միջոցառումներին։ Գրանդին մասնավորապես հետաքրքրված էր Լեռնային Ղարաբաղից ավելի քան 100 հազար հայ փախստականների սոցիալական և բնակարանային պայմաններով, ինչպես նաև որոշ այլ հումանիտար հարցերով։ Այս համատեքստում Հանրապետության Նախագահը հանգամանորեն ներկայացրել է կարճ ժամանակահատվածում ՀՀ կառավարության կողմից իրականացվող ծրագրերն ու միջոցառումները, որոնք ուղղված են բռնի տեղահանված այս հայերի ինչպես առաջնային, այնպես էլ բազմաբնույթ խնդիրների լուծմանը։