News - Շուրջ 70 մլն դոլար է հատկացվել Ղարաբաղից Հայաստան բռնի տեղահանվածների ծրագրերին.

2023 թվականին մոտ 29 մլրդ դրամ (մոտ 70 մլն դոլար) հատկացվել է Լեռնային Ղարաբաղից բռնի տեղահանվածների ծրագրերին։ Այս մասին չորեքշաբթի լրագրողների հետ հանդիպման ժամանակ հայտարարեց ՀՀ աշխատանքի և սոցիալական հարցերի նախարար Նարեկ Մկրտչյանը։ Նա ընդգծեց, որ միջազգային դոնորները հատկացրել են մոտ 1,5 մլրդ դրամ։ Նրա խոսքով, 112 հազար բռնի տեղահանված հայեր միանվագ ստացել են 100 հազարական դրամ։ Պաշտոնյան հավելեց, որ ավելի քան 104.000 մարդ հոկտեմբերին ստացել է 50.000-ական դրամ (40.000+10.000 դրամ), նոյեմբերին՝ 77.000, իսկ դեկտեմբերին՝ 82.000 մարդ՝ վարձավճարի և կոմունալ ծախսերը վճարելու համար։ Նախարարը նշեց, որ նոյեմբերին սպառողական ծախսերի համար 69 հազար մարդ ստացել է 50 հազարական դրամ, իսկ դեկտեմբերին՝ 74 հազար։ «Հաշմանդամության կամ կերակրողին կորցնելու համար կենսաթոշակներ կամ նպաստներ են վճարվել 11700 անձի»,- նշեց Մկրտչյանը՝ հավելելով, որ կենսաթոշակի կամ նպաստի համար դիմելու հնարավորություն կա մինչև մարտի 11-ը։ «135 հոգու ծննդյան նպաստ է նշանակվել, 55 հոգու՝ մայրության, 165 հոգու՝ մինչև 2 տարեկան երեխայի խնամքի նպաստ»,- նշեց նախարարը։ Իսկ երրորդ և յուրաքանչյուր հաջորդ երեխայի ծննդյան կապակցությամբ Լեռնային Ղարաբաղից բռնի տեղահանվածների ընտանիքներին նույնպես ամսական 50000 դրամ նպաստ կվճարվի մինչև երեխայի 6 տարեկան դառնալը։