News - Կենտրոնական բանկի պաշտոնյան. Բանկային ծառայությունները շատ մատչելի են ՀՀ քաղաքացիների, բիզնեսի համար

Հայաստանի քաղաքացիները շատ քիչ են վճարում բանկային ծառայություններից օգտվելիս։ Այս մասին չորեքշաբթի Ազգային ժողովում պատգամավորների հետ հանդիպման ժամանակ ասաց ՀՀ Կենտրոնական բանկի (ԿԲ) ֆինանսական համակարգի կայունության և կարգավորման տնօրինության տնօրեն Գարեգին Գևորգյանը։ Գևորգյանը վստահեցրեց, որ պատկերը գրեթե նույնն է իրավաբանական անձանց դեպքում, և Հայաստանում բանկային ծառայությունները շատ մատչելի են նաև բիզնեսի համար։ Նրա գնահատմամբ՝ նախորդ տարի Հայաստանում ֆիզիկական անձանց մատուցվող ծառայությունների բանկային վճարները չեն փոխվել, և այդ ծառայությունների մեծ մասը հիմնականում մատուցվում է անվճար։ «Հայաստանի ներսում բանկային փոխանցումների քանակն ու չափը 2022 թվականի համեմատ աճել է 10 տոկոսով։ Գործարքների 75 տոկոսն իրականացվել է առցանց՝ առցանց բանկինգի միջոցով, 91 տոկոսի դեպքում փոխանցումներն անվճար են եղել, գումար չի եղել։ Խոսքը Հայաստանի տարածքում ռեզիդենտների միջև դրամով գործարքների մասին է»,- հավելեց ՀՀ ԿԲ պաշտոնյան։