News - 2023 թվականին Հայաստանում գրանցվել է 2 տոկոս գնաճ

Վիճակագրական կոմիտեից NEWS.am -ին հայտնում են, որ Հայաստանում 2023 թվականի հունվար-դեկտեմբերին նախորդ տարվա նույն ժամանակահատվածի համեմատ գնաճը կազմել է 2 տոկոս։ Հայաստանի սպառողական շուկայում 2023 թվականի դեկտեմբերին նախորդ տարվա նույն ժամանակահատվածի համեմատ արձանագրվել է 0,6 տոկոս գնանկում, մինչդեռ նոյեմբերի համեմատ գրանցվել է 0,9 տոկոս գնաճ։ Սննդամթերքի և ոչ ալկոհոլային խմիչքների գները 2023 թվականին նախորդ տարվա համեմատ նվազել են 0,5 տոկոսով, իսկ նոյեմբերի համեմատ գներն աճել են 2 տոկոսով։ Ոգելից խմիչքների և ծխախոտի ապրանքների գները մեկ տարում աճել են 8,5 տոկոսով, հագուստը և կոշիկը` 5,2 տոկոսով, իսկ բնակարանային ծառայությունների, ջրի, էլեկտրաէներգիայի, բնական գազի և վառելիքի այլ տեսակները` 2,8 տոկոսով։ Գնաճ է արձանագրվել նաև Հայաստանի ոչ պարենային ապրանքների շուկայում։ Այս գները 2023 թվականի հունվար-դեկտեմբերին նախորդ տարվա համեմատ աճել են 1,7 տոկոսով։ Զգալի գնաճ է գրանցվել նաև Հայաստանի սպասարկման ոլորտում։ Ըստ այդմ՝ նախորդ տարվա համեմատ այս գնաճը կազմել է 4,5 տոկոս։