News - Հայաստանի վարչապետը ցավակցական ուղերձ է հղել Ճապոնիայի գործընկերոջը

ՀՀ վարչապետ Նիկոլ Փաշինյանը ցավակցական ուղերձ է հղել Ճապոնիայի վարչապետ Ֆումիո Կիսիդային՝ Իշիկավա պրեֆեկտուրայում և Ճապոնիայի հարակից շրջաններում տեղի ունեցած ավերիչ երկրաշարժի և դրան հաջորդած ցունամիի կապակցությամբ, որը տասնյակ մարդկանց կյանքեր խլեց և մեծ ավերածություններ պատճառեց։ Այս դժվարին պահին Հայաստանը և հայ ժողովուրդը կանգնած են բարեկամ ճապոնացի ժողովրդի կողքին, նշել է Փաշինյանը իր ուղերձում։ ՀՀ վարչապետը նաև վստահություն է հայտնել, որ Ճապոնիայի կառավարության ձեռնարկած վճռական գործողությունների շնորհիվ այս տարերային աղետի ծանր հետևանքները արագ կհաղթահարվեն։ Բացի այդ, Փաշինյանը ցավակցություն և զորակցություն է հայտնել այս աղետի հետևանքով զոհվածների ընտանիքներին և ընկերներին, իսկ բոլոր տուժածներին մաղթել տոկունություն և շուտափույթ ապաքինում։