News - Հայաստանի վարչապետը և Իրանի նախագահը հեռախոսազրույց են ունեցել

Վարչապետ Նիկոլ Փաշինյանը և Իրանի Իսլամական Հանրապետության նախագահ Էբրահիմ Ռաիսին հեռախոսազրույց են ունեցել, հայտնում է ՀՀ կառավարության մամուլի ծառայությունը։ Քննարկվել են տարածաշրջանում տիրող իրավիճակին վերաբերող հարցեր։ Մասնավորապես, անդրադարձ է կատարվել Լաչինի միջանցքի անօրինական արգելափակման հետեւանքով Լեռնային Ղարաբաղում խորացող հումանիտար ճգնաժամին, Լեռնային Ղարաբաղի շուրջ ադրբեջանական զորքերի կուտակմանը, հայ-ադրբեջանական պետական ​​սահմանին լարվածության աճի միտումներին։ Վարչապետ Փաշինյանը ևս մեկ անգամ ընդգծել է հավատարմությունը 2022 թվականի հոկտեմբերի 6-ի Պրահայի և 2023 թվականի մայիսի 14-ի Բրյուսելի պայմանավորվածություններին, ինչպես նաև բոլոր հարցերը բացառապես դիվանագիտական ​​մեթոդներով և կառուցողական մթնոլորտում լուծելու մոտեցմանը։ Վարչապետը պատրաստակամություն է հայտնել հրատապ քննարկումներ անցկացնել Ադրբեջանի նախագահի հետ՝ ուղղված լարվածության թուլացմանը։ Քննարկվել են նաև Հայաստան-Իրան երկկողմ օրակարգին առնչվող հարցեր։