News - Քննարկվել է Հայաստանում ԵՄ բյուջետային աջակցության ծրագիրը

Կրթության, գիտության, մշակույթի և սպորտի նախարար Ժաննա Անդրեասյանը և ֆինանսների նախարար Վահե Հովհաննիսյանը հանդիպել են Հայաստանում Եվրոպական (ԵՄ) պատվիրակության ղեկավար, դեսպան Վասիլիս Մարագոսի հետ՝ քննարկելու ԵՄ բյուջետային աջակցության ծրագրի կրթական բաղադրիչը։ ԿԳՆ-ից NEWS.am-ին հայտնում են, որ կրթության, գիտության, մշակույթի և սպորտի նախարարը կարևորել է ԵՄ-ի հետ համագործակցության շարունակականությունը Հայաստանի կրթության ոլորտում բարեփոխումների համատեքստում։ Անդրեասյանն ընդգծեց, որ այս պահին երկրում բարեփոխումներ են իրականացվում հանրակրթության ոլորտում և նոր ստանդարտի ներդրում՝ ԵՄ աջակցությամբ։ Ֆինանսների նախարար Վահե Հովհաննիսյանը նույնպես կարևորել է ԵՄ-ի հետ համագործակցությունը և հույս հայտնել, որ այն խորացնելու փոխադարձ հանձնառությունը նոր թափ կհաղորդի Հայաստանում ընթացիկ և առաջիկա նախաձեռնությունների իրականացմանը։ Դեսպան Մարագոսը, ընդգծելով Հայաստանի հետ իրենց հաջող համագործակցությունը, պատրաստակամություն հայտնեց միավորել ջանքերը այն զարգացնելու ուղղությամբ։ Մարագոսը նաև բարձր է գնահատել ՀՀ կառավարության կողմից իրականացվող դպրոցաշինական լայնածավալ աշխատանքները՝ նշելով, որ ԵՄ-ն նույնպես դիտարկում է այս գործընթացում Հայաստանին աջակցելու հնարավորությունը։ Քննարկման ընթացքում նշվել է, որ Հայաստանին հատկացվող ԵՄ բյուջետային աջակցությունը շարունակական է լինելու, որում երկրի կրթության ոլորտի համար նախատեսված մասնաբաժինը կկազմի շուրջ 5 մլն եվրո։ Կողմերն անդրադարձել են նաև Լեռնային Ղարաբաղից բռնի տեղահանված հայերի աջակցության ծրագրերին, մասնավորապես նրանց կրթական կարիքների գնահատմանը, հայկական պետության կողմից իրականացվող առաջնահերթ քայլերին և նախատեսվող երկարաժամկետ լուծումներին։ Կրթության, գիտության, մշակույթի և սպորտի նախարարն ընդգծել է ԵՄ-ի շարունակական աջակցությունը այս փախստականների կարիքների լուծման գործում: Զրուցակիցները քննարկել են նաև երկկողմ հետաքրքրություն ներկայացնող մի շարք այլ հարցեր և պատրաստակամություն հայտնել համատեղ ջանքեր գործադրել Հայաստան-ԵՄ ներկայիս համագործակցությունն առավել արդյունավետ դարձնելու համար։