News - Փոխարտգործնախարարը Ժնևում. Հայաստանը կշարունակի իր հանձնառությունը ցեղասպանության կանխարգելման գործում (ՖՈՏՈ)

Հայաստանի փոխարտգործնախարար Վահան Կոստանյանը երկուշաբթի և երեքշաբթի օրը Շվեյցարիայի Ժնև քաղաքում մասնակցել է Մարդու իրավունքների 75 բարձր մակարդակի միջոցառմանը, որը նվիրված էր Մարդու իրավունքների համընդհանուր հռչակագրի 75-ամյակին։ Հայաստանի արտաքին գործերի նախարարությունից NEWS.am -ին հայտնում են, որ միջոցառմանը ՄԱԿ-ի անդամ երկրները ներկայացրել են մարդու իրավունքների և հարակից մի շարք ոլորտների վերաբերյալ իրենց խոստումներն ու պարտավորությունները: Այս միջոցառման իր խոսքում ԱԳ փոխնախարարը ընդգծեց ցեղասպանությունների կանխարգելմանն ուղղված Հայաստանի աննկուն հավատարմությունը և վերահաստատեց երկրի պատրաստակամությունը ջանք չխնայելու միջազգային մեխանիզմների և մարդու իրավունքների կոպիտ խախտումները կանխելուն ուղղված արձագանքների ամրապնդման ուղղությամբ։ Հայկական պատվիրակության ղեկավարը նաև նշել է մարդու իրավունքների պաշտպանության պարտավորությունների կատարման և Հայաստանում ազգային հաշվետվողականության մեխանիզմի ներդրման ուղղությամբ ձեռնարկվելիք միջոցառումները։ Հայաստանը վերահաստատեց իր հանձնառությունը՝ աջակցելու Ադրբեջանի կողմից Լեռնային Ղարաբաղի հայկական էթնիկ զտումների հետևանքով բռնի տեղահանվածների կարիքների լուծմանը և հիմնարար իրավունքների պաշտպանությանը։