News - Իրանը ողջունում է Հայաստան-Ադրբեջան համատեղ հայտարարությունը

Իրանը ողջունում է հայ-ադրբեջանական համատեղ հայտարարությունը տարբեր հարցերում երկկողմ համագործակցության, այդ թվում՝ ռազմագերիների ազատ արձակման վերաբերյալ։ Այս մասին երկուշաբթի օրը Թեհրանում իր ամենշաբաթյա ճեպազրույցի ժամանակ հայտարարել է Իրանի արտաքին գործերի նախարարության պաշտոնական ներկայացուցիչ Նասեր Քանանին, հաղորդում է IRNA-ն։ Իրանը համատեղ հայտարարությունը դիտարկում է որպես դրական քայլ երկու երկրների միջև փոխադարձ համաձայնության հասնելու ուղղությամբ, ընդգծել է Քանաանին։ Անցյալ շաբաթ Հայաստանի վարչապետի գրասենյակը և Ադրբեջանի նախագահի աշխատակազմը հանդես են եկել համատեղ հայտարարությամբ, որում տեղեկացրել են, որ Ադրբեջանը ազատ կարձակի 32 հայ գերիների, իսկ Հայաստանը՝ երկու ադրբեջանցի զինծառայողների։