News - Թուրքիայի նախագահը խոսել է Գազայի հատվածում այլատյացության և մարդու իրավունքների կոպիտ խախտումների մասին

Իսլամաֆոբիան և այլատյացությունը, որոնք թունավոր բաղեղի պես թափանցել են արևմտյան հասարակությունները, մարդու իրավունքների հիմնական սպառնալիքներից են: Այս մասին հայտարարել է Թուրքիայի նախագահ Ռեջեփ Թայիփ Էրդողանը Մարդու իրավունքների համաշխարհային օրվան նվիրված «Մարդկության դեմքը» հաղորդման ժամանակ, փոխանցում է Anadolu-ն։ Թուրքիայի նախագահի խոսքով, հակառակ նրան, որ Մարդու իրավունքների համաշխարհային օրը նշվում է դեկտեմբերի 10-ին, աշխարհի շատ երկրներում մարդու իրավունքները ոտնահարված են։ «Մուսուլմանների այն հատվածները, որոնք կազմում են միգրանտների մեծամասնությունը, անկասկած, ամենաշատն են տուժում այլատյաց, ռասիստական, խտրական և ֆաշիստական ​​գործելակերպի դրսևորումից»,- նշել է Էրդողանը։ Էրդողանն ասել է, որ մահմեդականների և միգրանտների դեմ սադրանքների աճ է նկատվել աշխարհի շատ մասերում՝ Կանադայից մինչև ԱՄՆ, Եվրոպայից մինչև ասիական երկրներ։ «Արևմտյան երկրները մտքի ազատության պատրվակով օրինականացրել, հավանություն են տվել և խրախուսել հակաիսլամական և հակամուսուլմանական գործողությունները»,- նշել է Էրդողանը։ Թուրքիայի նախագահն ասել է, որ այսօր այն վայրը, որտեղ կոպտորեն խախտվում է ՄԱԿ-ի Մարդու իրավունքների համընդհանուր հռչակագիրը, դարձել են Գազայի հատվածը և պաղեստինյան օկուպացված տարածքները։ «Իսրայելի իշխանությունները, վայելելով Արևմուտքի անսահմանափակ աջակցությունը, Գազայում դաժան վայրագություններ և ջարդեր են իրականացնում, որոնք կստիպեն «կարմրել» ողջ մարդկությանը», - ասել է Էրդողանը։ Միևնույն ժամանակ, Թուրքիայի նախագահը կարծում է, որ իրականում հնարավոր է արդար խաղաղություն, բայց ոչ ԱՄՆ-ի հետ, «որովհետև Ամերիկան ​​Իսրայելի կողմն է», - ասաց նա։