News - ԵՄ արտաքին քաղաքականության պատասխանատուն ողջունում է Հայաստան-Ադրբեջան համատեղ հայտարարությունը

ԵՄ-ն ողջունում է Հայաստանի և Ադրբեջանի համատեղ հայտարարությունը կալանավորների փոխադարձ ազատ արձակման և վստահության ամրապնդման այլ միջոցների մասին, որը կարևոր քաղաքական քայլ է։ Այս մասին նախկին Twitter-ում X-ում նշել է Եվրամիության արտաքին գործերի և անվտանգության քաղաքականության գերագույն ներկայացուցիչ Խոսեպ Բորելը։ «Մենք համաձայն ենք, որ տարածաշրջանում խաղաղության հասնելու պատմական հնարավորություն կա և հավատարիմ ենք այդ ջանքերին աջակցելուն», - ավելացրել է ԵՄ արտաքին քաղաքականության պատասխանատուն։ Հինգշաբթի երեկոյան հաղորդվեց, որ Հայաստանն ու Ադրբեջանը համաձայնության են եկել իրենց միջև վստահության ամրապնդմանն ուղղված քայլերի շուրջ։ Եվ այդ միջոցառումների շրջանակներում Ադրբեջանը կազատի 32 հայ զինվորի, իսկ Հայաստանը՝ երկու ադրբեջանցի զինվորի։