

Շատ բան կախված է ադրբեջանական կողմից. Չի կարելի կրակել ու սպանել հայ զինվորին, ներխուժել Հայաստանի տարածք, ասել՝ գիտես ինչ, ես վախենում եմ հայկական ռեւանշիզմից։ Այս մասին հինգշաբթի ԱԺ-ում լրագրողներին ասաց ՀՀ Ազգային ժողովի նախագահ Ալեն Սիմոնյանը՝ անդրադառնալով Ադրբեջանի նախագահ Իլհամ Ալիևի հայտարարությանը, թե իրենք պատերազմ չեն ուզում, բայց վախենում են հայկական ռեւանշիզմից և պահանջում են. դրա դեմ երաշխիք: «Նա [Ալիեւը] պետք է այդ երաշխիքը նախ փնտրի իր մեջ, իր քաղաքականության մեջ, չի կարելի խաղաղության պայմանագրի նիստերին չգալ ու ասել՝ ես վախենում եմ ռեւանշիզմից։ Չի կարելի տարբեր տեղերում աղմուկ բարձրացնել։ Ինչ վերաբերում է զենքին, որը պաշտպանական է, որը գնել է Հայաստանը, իսկ եթե համեմատենք Ադրբեջանի հետ, ապա նրանք միայն ատոմային ռումբ չունեն, և ասում են՝ մենք վախենում ենք ռեւանշիզմից, դուք վախենում եք ռեւանշիզմից, հաստատեք. նորմալ հարաբերություններ ձեր անմիջական հարեւանների հետ»,- հավելեց Հայաստանի խորհրդարանի նախագահը։